-->

Articles by "Senibudaya"

Showing posts with label Senibudaya. Show all posts

6/04/2020 08:11:00 PM
Oleh : Pinto Janir

“Yanti serius mau ikut di usaha ko?” 

“Apo uda sangko Yanti bagarah?” 

“Kalau iyo Yanti serius, bekoh uda telepon baliak Yanti sabanta lai”.

Rundi manutuik taleponnyo tu. Inyo caliak dari jauh,  Syafri, Datuak Saga, Idaih Pangok jo Eri Taduang tampak masih asik mangecek-ngecek juo baru. Agak serius tampak e urang ko mah. Rundi  bajalan-jalan ngenek  ka arah urang ko jo wajah nan cerah bana. 

Baitu sampai, inyo lansuang batanyo ka Syafri. 

“Ba- Syaf. Ba-a paretongan jo Datuk Saga ko ?” sambia mamandang ka Datuk Saga.

Alun sempat Syafri manjawek, Datuk Saga lah lansuang se manyolo: “ Kalau di ambo Pak, soal paretongan ko kaji manurun se ko nyo. Ba-a tu ndak Taduang”. 

Datuk Saga  mancaliak ka arah kamanakannyo nan banamo Eri Taduang. Taduang maangguak kareh.  “ Ba-a tu ndak Daih. Lai suai dek wa ang tu?”, kato Datuak Saga sambia malenong  pulo ka arah Idaih Pangok. Lansuang se Idaih manjawek: “ Kalau lah iyo dek Datuak tantu  iyo pulo dek ambo. Dek kami baduo ko Tuak. Sebagai kami kamanakan Datuak, nan kami tantu tasarah apo kaputusan mamak. Kan baitu ndak Taduang?” , Idaih malewakan kato ka Eri Taduang, dunsanak sakaumnyo ko. 

“Jadi ba-a Tuak?” kini justru Syafri pulo nan batanyo ka Datuak Saga sang mamak kapalo warih nan ka malego tanah pusako tingginyo saluweh 2,5 hektar ka Syafri jo ka Rundi. 

“Tapi lah ambo kecek an ka apak-apak tadi mah. Kalau harago lah sasuai , sanang di apak, sanang pulo di kami. Apak indak maraso tamaha, nan  kami indak pulo maraso tarugi !” jawek Datuak Saga. 

“Jadi bara sameter jatuh e harago tanah Datuak ko?” tanyo Syafri jo nada nan agak pasti. 

“Sabanyak nan ambo kecek an tadi lah !”

“Indak bisa dikurangan lai, Tuak ?” 

Datuk Saga tahaniang sabanta. Inyo isok rokok gudang garam merah e tu agak dalam. Inyo pandang Syafri jo maangguak-angguak ketek. Sudah tu nyo lapehan asok rokok tu, baru inyo mangecek lo baliak.  

“ Rencana apak di ateh tanah ko ka mambuek apo?  Mambuek usaho ndak?” 

Ditanyo takah itu, Syafri jo Rundi hampiang sarentak maangguak. 

“Inyo baitu lo mah Pak. Bak kato rang gaek-gaek wak dulu heh, kalau ka mambukak usaho ko Pak, harus dimulai jo raso damai. Ijan jo raso batikai-tikai. Sajak tadi awak batikai juo baru soal harago ka harago.  Baputa-puta di sinan se. Soal tanah ko indak buliah awak patikaian bana doh Pak oi. Asa awak ko  dari tanah. Bagaduah wak soal harago, epek e nantik ka usaho apak ko  juo. Kok dapek, lanca apak mambali, indak banyak tawar manawar nan tajadi. Iko ibaraik urang baralek mah Pak. Kalau alek galeboh di awal itu alamaik indak ka lamo rumah tangganyo batahan. Basilang di harago, cilako nan ka tumbuah” 

“ Ijan jauh-jauh bana mangecek Tuak “, Syafri manyalo sambia galak sengeang. 

“ Ambo alun sampai mangecek, apak lah mamotong sakali. Danga dulu ambo mangecek. Ko indak.  Di sinan kanai apak ….he…he…he…”, Datuak saga galak-galak ketek. 

“Jadi ba-a ko Tuak ? Nan sabananyo se lah Tuak…” 

“ Tapi alah ambo kecek an sajak tadi . Kalau apak satuju 400 ribu sameter, apak ambiaklah.Kalikan se lah duo satangah hektar!”

“ Kok tigo ratuih ba-a?”

“ Ancak ambo jua ka Ko Hong lai. Ko Hong lah mahago tigo ratuih limo puluah sameter…..”

“Baitu se lah Tuak. Kini main capek se lah awak lai. Tigo ratuih duo puluh limo ribu  ba-a?”

“Kalau sabanyak  tu takanai lah galeh ambo! Itu indak manenggang ambo namonyo apak tu doh. Lah jaleh kamanan ambo banyak. Banyak nan ka ambo agiah untuak dibagi-bagi. Kini baitu se lah, pado tanah ko tajua ka Ko Hong, naik an lah agak saangin lai. Tigo ratuih ampek puluah…ba a ?”. 

Dek pasai tawar manawar, akhianyo jatuah harago manjadi tigo ratuih tigo puluah ribu sameter. 

“ Kalau baitu Tuak, okelah. Kami sipakaik mambali…!”

Datuak Saga maangguak-angguak sanang. Sudah tu nyo miriangan bahunyo   snek ka Syafri bantuak urang ka babisiak. 

“ Bisa ambo pakai pitih apak agak saratuih juta lu?Soal kwitansi bekoh bia ambo tando tangani…sebagai depe. Ba-a tu ndak Daih? Kan Baitu ndak Taduang?” 

“ Kalau pitih kontan, iyo indak adoh kini doh Tuak.Kalau ambo transfer ba-a? Kirim ka ambo nomor rekening Datuak” 

“ Ndak usah main transfer dulu Pak. Nan kontan tu bara baru adohnyo?”

“ Kalau di ateh oto ambo pitih adoh sekitar sapuluah juta tu nyo. Angku 
adoh mambaok ptih Rundi? “ tanyo Syafri ka Rundi. 

“ Mungkin adoh di ateh oto agak limo baleh juta….”

“ Duo puluah limo juta, alah jadi sabanyak tu dulu tu…isuak isuak kan bisa ditambah….” lakeh-lakeh Datuak Saga manjawek. 

Rundi dan Syafri diiringi dek Datuak Saga sarato duo urang kamanakannyo bajalan manuju oto nan diparkir di dakek sebuah lapau kopi di tapi jalan tu. Sambia manunggu pitih tibo, Datuak Saga jo kamanakannyo tampak mamasan kopi satangah galeh surang. 

Di lapau kopi tu pulo Syafri manyarahkan pitih tando jadi  sabanyak Rp 25 juta. Datuak Saga lansuang manandotanganan kwitansi ateh namo titipan pitih. 

Sasudah mambarikan pitih , Syafri jo Rundi bajanji batamu untuak makan siang di Rumah Cobek Labrrazzo (Rucola)  nan barado di jalan haji Miskin nomor 67 Bukittingg. Rumah makani ko terkenal di kota ko jo ayam panggangnyo nan lamak sarato murah pulo haragonyo. 

Baru se Syafri jo Rundi naik ka ateh oto, alun bajalan gai oto e ko lai doh, duo kamanakan Datuak Saga yaitu Eri Taduang jo Idaih Pangok lansuang manampuang tangan bantuak mamintak bagian. 

“ Tuak ambo paralu pitih tu agak snek Tuak….!” kecek Taduang.

“Ambo iyo lo Tuak !” kato Idaih Pangok sambia mahiruik angok e nan tadanga babunyi-bunyi tu. 

“Utak kalian pitih se.Tanah alun tajua , pitih lah kalian cikaraui ! Jaleh, banyak nan ka awak urus lai. Paciak lah sabanyak ko dulu ha. Jan banyak bana tanyo”, kato  Datuak Saga jo suaro tinggi sambia mancabuik 10 lembar pitih saratuih ribu nan masih tagang-tagang tu. Limo untuak Idaih.Limo lai untuak Taduang. Bagi Idaih jo Taduang, pitih sabanyak tu lah laweh bana deknyo tu. Urang baduo ko indak barani mintak tambah dek karano inyo tahu, bahaso tabiat mamaknyo ko main tuga se. Taduang jo Idaih ko, wakatu ngenek-ngenek acok kanai lampang dek mamaknyo nan panabik suga ko ko mah. Datuk Saga ko jagok basilek. Agak dukun lo bunyi kaba saketek. Di kampung ko indak adoh urang nan barani madok ka Datuk Saga ko doh. Kampuang ko  itam putiah bantuak talatak di tangan Datuk Saga. Tak bisa diasak. Tak bisa diusik. Kalau diasak jo diusik, inyo manggalagak. Inyo Datuk main baga !

Samantaro Rundi jo Syafri lah tibo di Rucola. Rundi ingin mambari tahu ka Syafri soal ka masuaknyo modal Yanti. 

“ Yanti ko sia ko.Apo tibonyo dek angku ?” tanyo Syafri. 

Tanpa gugup Rundi manjawek: “ Kawan ambo wakatu SMP !”

“Kawan atau kawan?” baleh Syafri agak jo nada manggoda.

Rundi hanyo galak sengeang. 

“ lai inyo bapitih?” kecek Syafri lo sudah tu. 

“Kalau inyo indak bapitih, indak ka ambo agiah tahu ka angku doh !” jawek Rundi sambia mahisok rokok nan indak lapeh-lapeh dari tangannyo sajak tadi. Rundi kancang marokok. Putuih sambuang putuih sambuang. Bantuak kareta api.  

Sudah tu urang ko baraliah kato sabanta. 

“Angku makan apo?” kato Rundi sambia mancaliak-caliak daftar menu di Rucola. 

“Ambo ayam baka “ jawek Syafri. Indak lamo kemudian, pasanan urang ko tibo. Sambia makan, duo sahabat ko asik  maota. 

“ Ba-a tadi soal kawan angku nan SMP tu?”

“Wakatu awak di lokasi tadi, inyo manelpon. Ambo sampaikan, bahaso ambo jo angku ka mambukak SPBU wisata dengan konsep resort dengan bangunan vila-vila dalam suasana hutan pinus”

“Ha tu? “

“Ambo katokan, bahaso awak ka maminjam tambahan modal ka bank. Mandanga awak ka maminjam, inyo lansuang mangecek,  indak usah pinjam di bank, inyo siap sebagai pendukung modal, karano inyo tertarik jo konsep nan ambo sampaikan!”

“ Rancak tu. Menarik dek ambo !” kato Syafri antusias. Untuak mambukak SPBU dan resort ko minimal dibutuhkan investasi nan sangaik gadang. Babarapo hari sabalunnyo, Syafri alah bicara gai jo Pak Gubernur satantang rencana mereka ko. Bahkan pak Gubernur manyambuiknyo dengan sangat hangat sekali. Syafri pun alah manyampaikan pulo rencananyo ko ka Pak Bupati bagai. Pak Bupati bajanji akan memberikan berbagai kemudahan manyangkuik perizinan.  Soalnyo  iko akan manjadi objek wisata baru di Ranah Minang. Samantaro, Syafri dan Rundi hanyo punyo cadangan dana sabanyak Rp 25 M surang. Tantu butuh dana tambahan. Kalau indak ka bank, yo ka Yanti. 

“ Tapi, ngomong-ngomong, bilo wak bisa bicara batigo jo Yanti tu?” 

“ Bilo rancak dek Angku ?” 

“ Selasa ambo ka Singapur. Bisuak ba-a?”

“Buliah….!” Jawek Rundi. 

Sasudah makan di Rucola nan balokasi di antaro Surau Gadang jo Palolok tu, di ateh oto inyo lansuang manelpon Yanti. Inyo pasang handsfree ka talingonyo. 

“ Assalamualaikum !”

“Waalaikum salam, Uda !” tadanga Yanti manjawek. 

“Yanti sadang di ma ?”

“Sadang di lua !”

“Di ma?” 

“ Di Matahari Plaza Andalas ….”

“ Jo sia …”

“Surang Da !”

“Manga Yanti ka Plaza Andalas ?”

“Mancari baju kok lai adoh nan ka sasuai di salero. Tadi Yanti mambalikan uda kemeja. Mudah-mudahan Uda suko….”

Ondeh—walau Rundi batoko baju, tapi  baralah ka sanangnyo hati Rundi mandanga Yanti mambalikannyo baju. Lakeh-lakeh inyo manjawek. 

“ Mokasih sayang. Uda pasti suko !” jawek Rundi jo nada suaro riang. 

“ Uda, di ma?” 

“Uda sadang di jalan. Manuju ka toko….!” 

“Hati-hati uda di jalan. Ijan lupo istirahat. Laloklah uda dulu….!” 

Begitu gadang  perhatian Yanti ka Rundi. Sadangkan Ijah, sajak tadi iyo alun adoh manelpon sakali alah juo lai. Lagi pulo, Ijah indak punyo kebiasaan manelpon-nelpon laki ko doh. 

“Yanti…..” 

“Apo da ?”

“Apo Yanti serius ka sato babisnis jo uda sarato kawan uda tu?”

“Emangnyo Yanti pernah indak serius ka Uda?” Yanti baleh manggoda. 

“Pernah….!”

“Bilo….?” Yanti baliak dengan suaro manjo.

“Waktu Yanti maninggakan Uda diam-diam dulu mah….”

“Kan Yanti lai batitip surek !”

“Kan indak sampai ka tangan uda doh….”

“ Manga Uda indak pernah baupayo mancari Yanti gai?” Yanti balik manakan Rundi. Rundi tadiam. Lakeh-lakeh inyo alihkan carito. 

“Kalau Yanti serius ka ikuik dalam bisnis ko, bisa Yanti bisuak pagi ka Bukittinggi ?”

Sungguh. Diam Yanti. Sabananyo inyo indak bisa ka Bukittinggi bisuak karano inyo lah bajanji jo bakonyo di Gunuang Pangilun ka pai jalan-jalan ka kawasan Mandeh. Janji ko alah padek. Makonyo Yanti mambali baju baru, untuaknyo dan untuak Didit anaknyo sarato untuak anak-anak Hendra nan kamanakan kontan papanyo tu. 

“ Ba-a kok Yanti diam?” 

“ Giko Da……” Yanti sabananyo ka manjawek indak bisa bisuak tapi katikok tu pangananyo barubah sakatiko. 

“Bisa Da !” 

“Uda tunggu Yanti siang bisuak dih . Bekoh uda serloc di ma tampek wak batamu batigo jo rekan bisnis uda tu, Syafri namonyo !”

Ba a juo lai. Indak tahu dijawek. Padohal Yanti ko alah bajanji arek bisuak ka mambaok bakonyo pai jalan-jalan ka Mandeh. Tapaso, inyo cari alasan untuak ba-a caro membatalkan janji ka bakonyo. 

Antah ba-a ko lah, sangaik barek bagi Yanti untuak mangecek an indak bisa ka Rundi. Inyo takuik urang nan disayangnyo ko bekoh kecewa. Pado Rundi kecewa, bagi Yanti bialah bakonyo nan kecewa. Pai jalan-jalan ka Mandeh, kan bisa kapan-kapan sajo. Lagi pulo, jadual Yanti di Padang kan masih agak lamo. 

Samantaro tu Rundi lansuang malajukan oto ka toko busananyo nan di jalan Minangkabau tu. Pulang dari toko nan indak jauh dari Jam Gadang tu, inyo pai pulo mancaliak toko grosirnyo nan di Aua nan alah lamo indak inyo kunjung-kunjungi. Rundi ko tamasuak pedagang grosir terbesar di Auakuniang. Sajak babini jo Saijah, rasaki Rundi naik taruih. Pitihnyo batambah banyak. 

Selain berdagang, beberapa tahun belakangan ini Rundi juga menggeluti bisnis investasi trading forex yang memiliki risiko tinggi tapi juga memiliki potensi untung yang tinggi. Di trading ini, keuntungan Rundi hingga miliaran rupiah. Ijah tak pernah tahu kalau Rundi adalah seorang trader yang sukses. Setahu Ijah bisnis Rundi hanya di toko busana dan grosir di Auakuniang. Itu sajo. 

Katikok patang hari barabuik sanjo, Rundi lah tibo di rumahnyo. Inyo caliak Ijah sadang asik manyiram-nyiram bungo. Ijah lansuang manyambuik Rundi. Dari dalam, duo anak-anaknyo lansuang pulo bagayuik di tangan papanyo ko. 

“Papa, nanti malam kita makan di luar ya…papa kan udah janji…..”, kato Grendi anak bujang Rundi nan kelas limo SD sambia dipakuaik dek si bungsu Suci nan baru kelas duo SD. 

“Iya….papa kan udah janji !” ujar Suci sambil terus bergayut di tangan sang papa. Anak-anak Rundi di rumah memang mamakai bahaso Indonesia sebagai bahaso pengantar Bukan bahaso Minang. Kini ko di Minangkabau, indak rang kayo indak rang  tidak, banyak para orangtua yang mamakai bahaso Indonesia sebagai bahaso di rumah jo anak-anaknyo. Labiah-labiah para papa dan mama muda, lah babahaso Indonesia raya bana jo anak-anaknyo.Kadang-kadang sakarek ula sakarek baluik gai. Khawatir awak, lamo-lamo bahaso Minang ko bisa juo lanyok mah ndak.  

Sudah tu Ijah sarato duo anaknyo mairingi Rundi sampai ka dalam rumah.. 

“Pa…jadi ya Pa ya…kita makan di luar”, si bungsu Suci marengek ngajak papanya untuak makan di lua. 

“ Udah….udah papa mau istirahat dulu !” kato Ijah sakatiko. Dan duo anaknyo ko lansuang pulo masuak  ka kamar surang-surang jo mambaok raso kecewa dek karano indak jadi pai makan basamo ka lua.  

Padahal kalau Ijah sato lo mandukuang kehendak anak-anaknyo untuak makan di lua, bisa dipastikan Rundi sulik untuak manulak. Hal iko indak dilakukan Ijah. Ijah ko alah bagageh pulo masuak ka kamar mairingi langkah laki.. 

Bukankah tadi sabalun Rundi pai manamui Syafri inyo lah baharok supayo udanyo ko ijan pulang talaruik malam bana. Baitu Rundi baru tibo di kamar, Ijah lansuang manutuik pintu kamar tu. Klik.Pintu nyo kunci sakali.

Bantuak urang baru-baru se lagak Ijah. Inyo  lansuang mamaluak mesra lakinyo ko. Indak biaso-biasonyo Ijah takah iko doh. Biasonyo nan acok mamaluak ko hanyo Rundi. Kini Ijah? A nan tajadi ko lah? Sajak percintaan samalam, hasrat Ijah memang mulai agak-agak hiduik. Agaknya Ijah tak seperti boneka lagi. Biasonyo inyo mahantang se. Patang malam tu indak. Inyo mulai mambaleh walau balasannyo alun sahangek jo sapadek balasan palukan Yanti ka Rundi, tapi jadi juolah. Daripado indak. 

Sayang, Ijah indak pernah tahu, ba-a kok hangek bana Rundi tadi malam tu. Tak lain dek karano nan tabayang dek nyo adolah wajah Yanti. Bukan Ijah. Ijah hanyo takah punyo badan yang ditumpangi dek jiwa dan bayang-bayang Yanti nan alah mambaluik pangana jo hati Rundi.

Hari ko Ijah jo harapan dan hasrat nan panas. Inyo paluak Rundi. Lakinyo ko diam sajo. Balasannyo indak sarupo malam tadi. Nyo sandakan wajahnyo ka dado Rundi.Inyo berharap Rundi membelai atau mengusap-usap rambuiknyo walau agak sangenek. Itu se jadilah bagi Ijah. Tapi, apo nan diharap-harapkan Ijah tak dilakukan dek Rundi. Bahkan Rundi lambek-lambek malapehkan palukan bininyo ko sambia mangecek-an; “ Uda mandi dulu Jah….!”

Ijah getir. Inyo manggigik bibia. Rundi lansuang masuak ka kamar mandi. Sudah mandi, azan mugarib pun tibo. Rundi dan Ijah lansuang sumbahyang mugarib. Namun sumbahyangnyo surang-surang sajo. Sajak nikah hanyo tigo kali luruih Rundi maimami Ijah sumbahyang. Sudah tu indak adoh  lai. Alasan Rundi maleh jadi imam dek karano ayatnyo itu ka itu se baru, surah tigo qul namonyo yakni surah Al-Ikhlas, Al-Falaq dan An-Naas.

Kini ko Ijah sangat rindu diimani laki. Lagi-lagi Rundi lah duluan se Sumbahyang. Mancaliak Rundi lah duluan Sumbahyang, Ijah pun pai mahambik uduak ka kamar mandi. Inyo Sumbahyang di balakang lakinyo ko. 

Sudah Sumbahyang, Rundi lansuang marabahkan diri ka ateh tampek tidua. Nan Ijah baitu sudah sumbahyang, inyo mangaji agak sabanta. Suaro Ijah ko kalau mangaji iyo sangaik santiang. Iramanyo merdu bana..  

Samantaro, walau badan Rundi latiah namun nan matonyo indak juo namuah dibaok lalok. Inyo sadang bapikia-pikia ba-a caro manyampaikan ka Ijah bahaso inyo bisuak ka maajak Yanti untuak ikuik sato dalam bisnisnyo.

Baitu Ijah salasai mambaco alquran dan mengucapkan Shadaqallahul-'adzim…nyo tutuik Alqur-an tu sambia nyo jujuang di kapalonyo. Sudah tu inyo sato pulo marabahkan diri di sampiang Rundi. 

Ciek tangannyo mamaluak Rundi nan tampak bantuak urang sadang bapikia kareh. 

“Apo yang Uda pikiakan?” 

“Itulah Jah. Setelah Uda hituang-hituang, tanyato pitih Uda jo Syafri indak cukuik untuak mambukak bisnis SPBU dalam konsep resort tu doh…!”

“Ijanlah Uda pasokan bana. Nan sacukuik pitih se lah Da….” kato Ijah lunak sambia tangannyo ndak lapeh-lapeh mamaluak lakinyo ko.

“Ijah kan tahu, bagi Uda kalau ka mambukak usaho tu bapantang untuak satangah-satangah”

“Jadi apo jalan kaluanyo dek Uda?” tanyo Ijah lambuik bantuak urang babisiak di daun talingo Rundi. Namun bisikan tu indak mamanciang gairah Rundi dek karano pangana Rundi manarawang ka pacar lamo. 

“Indak adoh pilihan lain, uda pinjam ka bank…..” kato  Rundi jo nada nan nyo buek-buek bantuak urang gamang katikok manyabuik “uda pinjam ka bank” tu….

“ Indak usah minjam ka bank Da. Risikonyo tinggi tum ah. ….!”

“Itulah Jah. Itu bana nan sadang tapikia dek Uda kini “ 

Tanyato pancingan Rundi nyo makan bulek-bulek  dek Ijah nan mangecek an “ risikonyo tinggi”. 

“Tapi…Jah……”

“Tapi apo Da?” , makin manjo suaro Ijah tapi tatap juo Rundi bantuak urang dingin di ateh tampek tidua. 

“Tapi…adoh urang nan ka sato bagabuang jo kami dan basadio pulo mamanuhi seluruh modal nan kami butuhkan !”. Ijah indak batanyo, sia urangnyo Da. Indak. Inyo justru mangecek data sajo: “Syukurlah Da kalau baitu ”

“Tapi Jah…..” 

Kali ka duo Rundi manyabuik kato “tapi”. Katikok inyo manyabuik kato “tapi” ko, tangannyo mengusap lembut rambut Ijah, tapi  tidak dalam birahi. 

“ Tapi apo Da?” makin manjo Ijah tampaknyo. 

“ Tapi Jah, urang nan ka sato jo kami ko inyo padusi?” 

“ Memangnyo kalau padusi ba-a Da?” 

“Itu bana nan ka Uda tanyokan ka Ijah. Ba-a pandapek Ijah?” agak hati-hati Rundi bakato. Sudah tu nyo tambahkan jo kato-kato takah iko: “ Sabananyo uda keberatan, tapi kawan Uda Syafri nan kareh manarimo jo maajaknyo ! Uda maleh….”. 

“Ba a lo uda kok maleh?”

“Maleh Uda. Bekoh macam-macam pulo kecek urang…Itu nan Uda takuik an”

Di siko kalirunyo kecek Rundi.Kato-kato Rundi ko justru manjadi pertanyaan bagi Ijah. Alam bawah sadar Ijah tampaknyo mulai agak bajalan. Naluri kebiniannyo mulai manggarik. 

“ Buliah Ijah tahu, sia urangnyo?”

“Urangnyo kawan lamo uda maso SMP  .Lakinyo dulu di Amerika”. 

Ha?Lakinyo dulu di Amerika? Rundi…Rundi. Tapi Rundi indak pulo baduto doh. Kan iyo mah, dulu laki si Yanti  ko di  Amerika. Sayang Ijah indak batanyo, kini lakinyo tu di ma? Kalau iko ditanyo Ijah, tantu jawabannyo : “ lakinyo lah maningga….”. Cilako lah jadinyo. 

Kalau mandanga lakinyo lah maningga, tantu otomatis bisa tasinyal  ka Ijah  bahaso urang nan ka bamitra jo lakinyo ba status jando. Partamo kawan SMP. Ka duo, lah jando pulo. Katigo, ka manjadi mitra dek laki awak. Ba-a kiro-kiro agak ati ko? Adokah bini nan indak gamang mampadiakan lakinyo bakarajo samo jo seorang jando mudo nan rancak nan bapitih pulo? Adokah…..? 

Sewaktu Rundi manyampaikan “ urangnyo kawan SMP Uda dulu” iyo agak tasirok juo snek darah Ijah. Sabana badasia. Dasianyo tu baru rado katikok Rundi manimpali “dulu lakinyo di Amerika”. 

“ Jadi ba-a pandapek Ijah?”

“Dek Ijah indak ba-a  ba-a gai doh Da…..asal…….” Ijah manggantuang katonyo sambia taruih marabahkan kapalonyo dalam-dalam ka dado Rundi nan bidang tu.

“Asal…..Uda indak macam-macam. Ijah picayo ka Uda”, kato Ijah. 

Sabananyo mandanga kato Ijah barusan tu adoh nan mangaranyam di hati Rundi yaitu katikok Ijah bakato  “asal uda indak macam-macam” . 

Indak macam-macam? E…Ijah….Ijah. Galak dunia mandanganyo. 

Rundi tanang sabanta. Kali ko inyo cium dalam-dalam ubun-ubun Ijah . Ijah bergetar dalam hasrat nan manggalagak bantuak kawan gunuang manyambuakan api. 

Rundi manarik angok dalam-dalam. Sudah tu nyo lapehan lambek-lambek. 

“Jah……”

“Yo Da……” 

“ Bisuak Ijah ikuik jo Uda dih, jo Syafri gai untuak mangawani Uda  manamui kawan uda ko dih…..” 

Ba-a kok Rundi sampai barani manawarkan hal iko ka Ijah? Dek karano inyo lah yakin bana bahaso  Ijah indak ka  pernah namuah dibaok kalau itu urusan bisnis. Makin dipaso dek Rundi, makin mailak bininyo ko mah. Rundi agaknyo alah mempelajari tabiat bini.  

“Bisuak Ijah pai jo Uda yo !”

“Ijah bialah di rumah se Da….!”

“Sakali ko Uda baharok Ijah untuak ikuik di pertemuan bisuak tu…..”

Makin dipaso dek Rundi makin kareh Ijah  mailak. Padohal itu bana nan katuju di hati Rundi mah. 

“ Kalaupujn Ijah pai, kama manga Ijah di sinan Da? Ka manggaduah Uda se tu nyo. Ancak lah Ijah di rumah se….”

Ijah…Ijah. Kok disabuik ka manggaduah se, tantu iyo. Basorak hati ketek Rundi dibueknyo. 

Indak lamo sudah tu azan Isya tibo. Rundi barasak dari ateh tampek tidua. Baitu pulo Ijah. Urang ko mahambiak uduak. Sakali ko Rundi maajak Ijah Sumbahyang bajamaah. Dapek dipastikan, ayatnyo tigo qul tu bana. 

Sudah Sumbahyang, Rundi lansuang marabahkan badan ka tampek tidua. Ijah maikuti takah tadi. Ijah rabah di sampiang Rundi. 

Ijah takah urang tak pasai mamaluak laki.Karano jak sahari tadi inyo maraso bagai urang baru-baru balaki. Siang taraso lamo dek mananti malam nan kasero.  

“Da….” Suaro Ijah mulai manjo. Matonyo lah mulai malunak bantuak adoh sesuatu ka di mintak. Dasia darahnyomulai agak lain. Dadonyo taraso naik turun. Inyo tabaka surang. Nan Rundi ko indak stek alahnyo. Sabananyo bukan Rundi tak arif. Inyo tahu dan dapek marasokan bahaso bininyo sadang butuah. Tapi ba-a lah. Partamo inyo sadang latiah bana dek ampiang indak lalok sapiciang pun sajak ka patang. Namun kalau dikecek-an alasan Rundi latiah, rasonyo indak pulo doh. Dulu, salatiah-latiah apopun Rundi, nan iko tatap inyo kajaan juo. Ka duo, inyo sadang laruik jo pikiran untuak mambukak usaho baru ko.Bacinto dalam bapikia kareh, ma bisa? Katigo, iko intinyo, pikirannyo sadang malayang jauh  ka Yanti !

“Da….” sakali lai Ijah bakato. Sakali lai Rundi bantuak urang indak kunjuang  mangarati. 

“Da…..!” 

“ Uda latiah Jah…Uda ngantuak Jah…..!” 

Ndak lamo sudah tu, Rundi iyo sabana-bana takalok ! 

Ijah kecewa…

Rundi mungkin sajo sadang bamimpi sero jo Yanti dek bisuak ka batamu pulo barangko…

Nun di Padang sana, di kamarnyo, Yanti dihantui kegelisahan nan tajam manyayat hati. Rindunya pada Rundi tak hanti-hanti. Ingin inyo redakan, tapi inyo indak kuaso. Adokah rindu nan indak maniayo? Kalau iyo rindu ko indah, ba-a kok sampai manyeso badan? 

(Basambuang) Bukittinggi 020620/0.53
Read more »

6/02/2020 02:18:00 AM
Oleh : Pinto Janir

Parak siang buto tu jalan sabana  langang. Apolagi hujan saharian sajak patang. Tambah jarang oto pribadi nan lalu lalang. Nan banyak batamu di tangah jalan dek Rundi adolah truk-truk gadang. Kesal Rundi mancaliak truk yang bakonvoi-konvoi nan jarak e agak rapek-rapek. Susah mamotongnyo. 

 Sarancaknyo dibuek aturan dek nan berwenang, jarak konvoi  hanyo buliah 50 meter sajo. Truk bairing-iriang jaraknyo hanyo saoto, babahayo mamotongnyo. Kadang dek jarak truk ko bairiang-iriangan talampau rapek, iko nan acok mambuek jalan Padang Bukiktinggi jadi macet barek. Bantuak ula oto pribadi mairiangan di balakang lambek-lambek. 

Kini,adoh tigo truk saliang bairiang-iriangan, nyo potong dek Rundi jo manakan gas nan kancang manintiang. 

Hampiang se bola tu gantuang. Katikok Rundi mamotong truk nan katigo, mandadak mancogok lo ciek oto travel di muko. Kalau turun se sangenek gas oto, alamaik cilako jadinyo. Sah baradu tagak barangko. 

“ Oi…tumbuang…Kama pai mato!” tadanga dek Rundi sorak supir oto  tu bacaruik  sambia maludah  nan aia ludahnyo  tu lakek ka kaco oto Rundi!

“Asatagfirullah….”, Rundi mangucap dek baru sajo salamaiak dari tabrakan maut. Lansuang ampek wajah tabayang di ruang matonyo. Wajah Ijah, wajah duo anaknyo dan wajah Yanti pacar lamonyo ko. 

Rinai jatuah baliak katikok Rundi baru masuak pasa Sicincin. Kini inyo alah sampai pulo di kawasan aia tajun Batang Anai perbatasan antaro bateh Kabupaten Padangpariaman jo tanahdatar--- atau memasuki kawasan  bukik Tambun Tulang nan rawan longsor tu. 

Sajak duo kali gampo gadang manimpo ranah Minang, yaitu tahun 2007 jo 2009 mambuek daya rakek tanah manjadi lungga. Paruik-paruik bukik  nan rangkah-rangkah ko , kalau bakataruihan nyo lapia dek hujan dareh  balamo-lamo bisa mambuek tanah rangkah ko  manjadi balah dan takulibak, sudah tu lonsor nan ka tajadi  lai. Batu-batu gadang nan tagayuik di pungguang bukik, bisa-bisa se maluncua ka bawah hinggo ka tapi jalan. 

Memang babayo malewati kawasan lembah anai di kalo hujan labek nan lah bajam-jam. Bahayo tu kini nan ditampuah dek Rundi. Salain masih alun pueh malapehan rindu ka Rundi, sabananyo wajar sajo rasonyo kalau Yanti sangaik keberatan jiko Rundi pulang ka Bukittinggi di parak siang buto nan ko. 

Walau jalan bakelok, namun laju oto Rundi  tatap bakisai. Tatap nyo pupuah. Antah apo nannyo kaja, ndak tahu wak doh. Inyo bantuak bakaja-kaja jo perasaan surang……… 

Drrrrrrrr…….!

Bunyi a tu? Rundi mancaliak ka balakang sakileh sajo. Tapi indak nampak.Galok. Katikok mancaliak ka balakang sakileh lai , inyo taparogok jo ciek oto sedan. Kalau indak nyo bantiang stir ka kida, sah inyo balangga, Rundi bisa jadi tingga nama. Tingga di hati Ijah, tingga di hati Yanti, tingga di batu nisan. 

Tapi untuanglah, untuak ka duo kali Rundi salamaik. Tapi nan oto sedan ko, supirnyo lai indak mampacaruik-an Rundi doh. Indak takah supir tadi. Mungkin supir tu mati takajuik sahinggo mungkin lupo bacaruik, atau inyo indak urang pacaruik samo sakali. 

Tapi tatap juo Rundi  indak tahu, bunyi apo nan mandarin sabanta ko tadi. Agak-agak atinyo, mungkin bunyi batu jatuah atau mungkin juo lonsor. 

Baitu tibo di Simpang Jambu Aia ,Rundi  lansuang manelpon Yanti sambia mambari kaba bahaso inyo lah sampai di Bukiktinggi.

“Uda lah sampai di Bukik Yanti….”
“ Alhamdulillah. Dari tadi Yanti indak bisa lalok. Untuang uda lah tibo. Baitu Uda pai tadi, perasaan Yanti indak lamak. Alah tibo Uda di rumah? ”, tanyo  Yanti.

“Alun lai.Masih di Jambu Aia…!” 

“Ooo….Kabari Yanti kalau uda lah sampai di rumah yo…”

Cilako.Yanti mulai mamintak nan indak-indak. Ba-a pulo kamangabarinyo tu. Parmintaan Yanto sakali ko, dibaok diam se dek Rundi. 

Katikok Yanti hanyo manjawek “oooo….” tu tadi  antah ba-a ko lah bangkik raso cimburunyo ka Ijah. Inyo gelisah membayangkan Rundi jo urang rumahnyo tu. Dalam bayangannyo, tantu Rundi alah malupokan Yanti kalau sadang dakek bininyo. Tantu inyo tibo di rumah lansuang bapulun-puluh. Sungguah, sabana indak mampu Yanti mambayangkan iko. Perasaannyo ngilu-ngilu subalah. 

Iyo sabana tertekan perasaan Yanti membayangkan kemesraan antaro Rundi jo Ijah kalau sadang di rumah. Raso tertekan iko inyo telan kelat hatinyo nan paliang dalam .Hatinyo manggigia surang manahan cimburu.  Inyo cubo  mamicaingan mato kareh-kareh. Makin inyo piciangan, hatinyo makin padiah. Ujuang-ujuangnyo, aia matonyo nan jatuah manitiak. Nyo suruakkan aia mato nan jatuah tu di balik banta. 

Ah, mangalo awak harus cimburu, bisiak kato hati Yanti dalam aia mato nan badari-darai. Bukankah inyo buklan siapo-siapo dek Rundi. Rundi hanyo sepotong ketek maso SMP. Hanyo pacar lamo. Yanti lelah. Yanti takalok !

Tibo di rumah, Subuh pas masuak pulo. Jarak  Padang Bukiktinggi di tampuah Rundi kurang dari satu satangah jam. Ijah nan tidua di ruang tangah, baitu bel babunyi langsuang tagak mahambua. Sajak malam tadi Ijah hanyo lalok-lalok ayam. Inyo indak bisa lalok dek pangananyo ka Rundi. 

Adaik Rundi nan indak ilang-ilang sajak manikahi Ijah adolah kemesraan nan sarupo taruih tapaliharo.  Ijah manyalim tangan Rundi.  Rundi mambaleh jo  manyayang kaniang Ijah. Katikok manyayang kaniang Ijah tu, adoh raso lain nan timbua di hati Rundi. Inyo maraso gagik surang. Ba-a kok gagik? Gagik dek maraso adoh nan aneh di ruang kiro-kiro. Kemesraannyo kali ko ka Ijah  manjadi kemesraan nan makin pura-pura. Kehadiran Yanti tanyato bapangaruah gadang ka daya pandang. Hatinyo mulai agak-agak hamba mancaliak Ijah. 

Walau alun lalok sapiciang juo, walau alun sempat-sempat Ijah batanyo nan Rundi alah lansuang se masuak kamar mandi.  Rundi bantuak urang tagageh-gageh. Bantuak urang gelisah. Indak biasonyo gaya Rundi takah iko doh. Ado babarapo kali Rundi pulang malam dek maurus bisnisnya, tapi baru sakali ko Rundi pulang parak siang buto dengan membawa hati yang kusuik. Samalam-malam hari Rundi pulang, biasonyo, Rundi lansuang se memesrai bininyo tu sabalun ka lalok. Tapi, kini ko indak. Rundi bantuak urang bagageh, mandi tagageh jalan gugup. Tabaco dek Ijah, tapi Ijah takuik batanyo.  Baitu Rundi sudah mandi, bariu Ijah mambaranikan diri batanyo jo panuah hati-hati.Inyo ingin manjago perasaan Rundi.  

 “ Ka pai kama uda, sapagi ko ?”

Aneh Ijah ko. Manga ndak ditanyo, kama uda sahinggo pulang parak siang buto? 

Rundi tatap juo alun manjawek. Inyo masih sibuk mangariangkan rambuiknyo nan basah tu jo handuk warna sirah ati. 

“Kama uda sapagi ko? Indak sumbahyang Subuh gai Uda dulu ?” 

Sabananyo Rundi paliang maleh kalau diingek-ingek an soal sumbahyang. Lah makin diingek an pulo inyo makin kesal jadinyo. Padohal, inyo lah baniaik bana untuak ka sumbahyang juo.

“Ijah, urusan ibadah uda ijan diikuik campuri !”  kecek Rundi nan lansuang mahambiak lapiak sumbahyang . 

Ijah tadiam.  Ijan maraso dikalasek dek laki surang. Ijah tatunduak. Ijah  haniang masai. Rundi lansuang sumbahyang. Antah lai khusuk inyo sumbahyang antah indak. Nan jaleh, dek konsentrasi nyo pacah mungkin ko, sumbahyang subuhnyo tu sampai 3 rakaat bagai.

Sabananyo  Ijah tahu kalau rakaat Rundi balabiah ciek. Karano wakatu Rundi Sumbahyang tu, inyo duduak di tapi tampek tidua sambia malipek-lipek kain. Ingin bana inyo untuak maingek an Rundi, tapi inyo indak  pulo barani. Inyo  takuik kalau  udanyo ko katasingguang pulo. Tapi inyo heran, alun pernah sakali alahnyo Rundi basikap takah iko. Agak kasa sikap Rundi taraso dek Ijah. Tapi, Ijah maklum. Sangko hatinyo, mungkin sajo udanyo ko gagal babinisnis jo mitranyo nan di Padang tu. 

Ijah labiah mamiliah diam daripado marusak suasana hati lakinyo. 

Indak lamo sasudah Rundi Sumbahyang, Ijah mandakek ka Rundi. 

Sakali lai inyo  mulai batanyo panuah hati-hati. 

“Ba-a bisnis uda di Padang tu, lai berhasil Da…..?”

Rundi mancaliak ka Ijah sabanta sajo. Sudah tu inyo malengah saciok mato. Antah apo nannyo kana. 

“ Apo nan uda pikiaan? “

Ditanyo Ijah model tu, Rundi tatap diam. Sudah tu Ijah mangecek sakali lai. “ Uda, kalau rasaki indak ka lari….?”

Rasaki indak ka lari? Rasaki apo pulo? Inyo iyo memang mangecek ka Ijah, ka Padang pai manamui rekan bisnis untuak mambukak usaho baru. Kini Ijah manyangko bahaso sikap Aneh Rundi dek gagal babisnis. 

Katikok bininyo batanyo bakato “rasaki indak ka lari” jatuah ibo Rundi lansuang ka bininyo ko. Antaro ibo jo hamba, perasaanko bakacamuak bantuak angina basabuang di ateh langik. 

Nyo pandang Ijah dalam-dalam. Makin nana inyo mancaliak Ijah,  makin aneh taraso dek nyo. Tibo-tibo inyo manjacial Ijah bantuak mancaliak Yanti. Wajah Yanti sabana samparono tibo di ruang pangananyo. Tabayang pulo  deknyo romantika gantuang tadi malam. Makin nyo caliak Ijah, makin takana kareh inyo jo pacar lamonyo tu. Mandadak, nan adoh di mukonyo ko seolah-olah adolah Yanti. 

Yanti…Yanti…Yanti….!

Kini Rundi mandadak tersenyum manih ka bininyo. Gairahnyo timbua mamuncak. Mungkin batua juo kecek urang , kalau urang sadang dimabuak cinto mako perasaannyo acok labil. Daya pandang  acok sasek. Iko bana  kini nan sadang dialami Rundi, mancalaik Ijah bantuak mancaliak Yanti. 

Geloranyo tabaka bak sinar matahari pagi nan masuak manambuih kaco jandela rumahnyo di salo gorden bawarna putiah jo abu-abu tu. 

Ijah haniang sajo katikok Rundi mancubo marangkuah tubuahnyo jo napasu nan maledak-ledak. 

Ijah ko tipikal padusi “manyarah”. Kalau dipanga-pangaan dek Rundi, inyo labiah acok jo gaya manyarah atau gaya tasarah. Kadang-kadang Rundi bantuak bahubungan jo boneka dibueknyo kalau mancumbui bininyo ko. Ijah indak takah Yanti. Kalau Yanti, saketek se takanai, balehnyo rancak. Ijah, lah kanai habis, balehnyo bantuak urang litak. 

Ba-a ko? 

Sikap Ijah nan takah itu di ateh tampek tidua  dulu indak manjadi masalah dek Rundi. Namun sajak batamu jo Yanti, hal iko manjadi kesalahan besar baginyo. 

Kini apo nan tajadi? 

Kini ko Rundi mancaliak Ijah raso mancaliak Yanti. Dalam pangananyo nan adoh di mukonyo ko adolah ngiang wajah Yanti nan seolah-olah nyato  di hadapadan mato, kapalo dan hasrat Rundi nan makin manggilo. 

Sebagai bini, Dek Ijah taraso bahaso gairah lakinyo kini agak babedo jo gairah nan taralah. Bantuak gata anak mudo. 

“Uda….” Ijah tauda katikok inyo marasokan sentuhan lembut lakinyo. 

Sakali ko Ijah indak pasrah-pasrah ban alai doh. Inyo cubo melayani Rundi jo balehan-balehan ngenek. Balehan pado indak. Iko nan mambuek Rundi makin manjadi-jadi. Indak tahu awak, apo Ijah maraso “taniayo” atau maraso tasero!

Rundi mamintak nan indak-indak. Nan indak pernah salamoko mereka lakukan dalam hubungan suami istri di ateh tampek tidua. 

“Jan , Uda. Malu awak !” desah Ijah di baliak talingo Rundi. Nan seolah-olah mandanga suaro Yanti. Walau Ijah bakato “ Jan Uda.Malu awak” namun kahendak lakiko tatap inyo panuhi. 

Makin tak basiagak lakinyo ko mencumbui Ijah. Mereka  bantuak sepasang pengantin nan indak saba menghadapi  malam partamo hinggo malam-malam katigo. 

“Udaaa……Uda…..!” suaro Ijah lunak-lunak mandasia bantuak bunyi ula. 

“Iyo…..ti !”

Ha?Iyo ti? Apo lo aratinyo ko ha. Apo mungkasuik Rundi manyabuik “ti” tu.Apo aratinyo iyo “Yanti!”. Sayang, kato-kato nan kalua dari muncuang Rundi ko indak tasimak dek Ijah karano mungkin Ijah sibuk dek kato-kato “Uda….Uda….” sajo agak ati. 

Tasintak saangin, baru Rundi tasadar bahaso nan sadang dalam rangkuhannyo ko adolah Ijah bininyo bukan Yanti pacar lamonyo. Katiko  nyaris sampai pada pendakian raso, pangana Rundi baliak sarupo samulo. Inyo mancaliak Ijah adolah Ijah, bukan lagi Yanti. 

“Ijaaaaahhhh!” nyo paluak arek-arek tubuah Ijah nan tak kalah-kalah amat dibandiang pacar lamonyo. Nyo sayang kaniang Ijah. Ijah marabahkan kapalonyo di dado Rundi. Urang ko latiah agaknyo. Hinggo Rundi jo Ijah takalok dalam salimuik ciek baduo. 

Rundi tajago dek adoh talepon dari Syafri. Nyo caliak jam alah pukua satangah sapuluah. Di sampiangnyo inyo caliak Ijah lalok lamak bana. 

Nyo pandang bininyo nan sadang lalok tu. Timbua raso ibonyo ka bini nan alah mambarinyo duo anak ko.  Sabananyo, urang saelok Ijah, tak pantas dan tak patuik untuaknyo khianati. Akan hal iko inyo sadar. Inyo tak bisa pulo manulak raso nan tibo untuak pacar lamonyo ko. Yaitu, raso cinto tapandam . Raso rindu tabanam.Raso  kasiah tasuruak…nan kini bangkik  sakareh kukuak ayam di pagi nan dijajah bulan nan kalam tatutuik awan. 

Nyo jawek talepon Syafri kawan nan barenca mambuka SPBU kreatif bakonsep resort atau tampek istirahat bernuansa wisata tu. 

“ Jam bara awak ka lokasi Syaf?” tanyo Rundi. 

“ Jam sabaleh. Ambo tunggu lansuang di lokasi dih !” jaweh Syafri. 

Pado wakatu tu Ijah tajago. Jo panuah manjo inyo paluak lakinyo ko. Sakali ko Ijah indak sarupo boneka lai doh.Kini antah ba a ko lah, inyo marasokan sesuatu nan indah dalam kenikmanatan raso nan salomo ko indak pernah inyo rasokan. Biasonyo, inyo dulu malayani laki hanyo jo raso “daripado indak”. Kini raso tu baganti manjadi “daripado lai”. Bahkan, inyo berharap, udanyo ko ijan malam bana pulang. Kok dapek agak capeklah sangenek. 

“ Uda ka pai kama?”

“Mancaliak tanah nan ka uda bali untuak mambukak usaho baru”, kato Rundi. 

“Jan malam bana pulang ndak Da?”

Ondeh mak oi, baru sakali ko Ijah bakato takah itu bana. Biasonyo, mau malam, mau indak, semua terserah Rundi. Kini, indak lai baitu. Ijah berharap lakinyo pulang capek. 

“ Oh yo, ba-a tadi, apo anak-anak lah pai sikolah?”

“Lupo uda, kini ko almanak merah!” kato Ijah bantuak indak namuah malapehkan palukannyo dari Rundi. Sabananyo, inyo ngin bamanjo-bamanjo labiah lamo lagi jo lakinyo. 

“Oh iyo. Merah almanac ruponyo  !” jawek Rundi  galak sengeang  sambia membelai lunak wajah istrinyo nan manih tu. 

Untuak kaduo kalinyo Rundi bagageh masuak  kamar mandi. Inyo mandi. Dan rambuiknyo basah pulo untuak kali ka  duo. 

Rundi maambiak surang baju apo nan ka nyo pakai. Di sinan latak  talalainyo Ijah. Baju laki manga indak diambiak an. Manga indak disiapkan bagai? Kopi laki indak dibuek an. Manga indak disadiokan? Bagi Rundi, soal iko dulunyo indak masalah. Tapi sajak yanti mambuek annoy kopi. Sajak Yanti manyadiokan inyo sawa hawai jo baju kaos untuak lalok…sajak itu pulo, nampak  diincek matonyo batapo banyaknyo kakurangan bininyo ko dibandiang pacar lamonyo, Yanti. 

Ba-a juo lai, tarimo se lah kini !

Rundi mangaluakan otonyo. Ijah malapeh lakinyo. 

“Uda…tunggu !” kato Ijah manyetop langkah lakinyo nan baranjak handak manuju pintu oto. 

“Apo ?” jawek Rundi. 

“Lupo uda?” kecek Ijah sambia manunjuak ka kaniangnyo. Kini ko Rundi nan  baganti bantuak boneka. Inyo bagageh manyayang kaniang bininyo bantuak urang kanai remot. Ijah tersenyum malapeh laki nan alah mangkhianatinyo. 

Sarupo biaso, tiok pagi Rundi sarapan dulu di kadai kopi Inyik Kareh. Sudah tu, sabalun manamui Syafri ,   inyo sempatkan ka tokonyo nan gadang tu sabanta. 

Kini inyo lah tibo di lokasi di tampek ma bajanji batamu jo Syafri. 

“ Tanah nan ka awak bebaskan adoh sekitar duo satangah hektar !” kato Syafri sambia manunjuk ka lahan di tapi jalan antaro Bukittinggi Payakumbuh. Tanah tu kini barupo sawah. 

“ Tanah ko sia punyo ?”

“Datuak Saga….”

“Alah Syafri hubungi ?”

“Alah, sabanta lai Datuak tu kamari !” jawek Syafri. Indak lamo sudah tu Datuk Saga pas turun dari oto avanzanyo basamo duo laki-laki nan ciek badagok nan ciek angok-angok i. 

Lansuang Syafri memperkenalkan Rundi ka Datuk Saga. 

“Iko mitra ambo. Kami nan ka mambali tanah Datuak ko !” kato Syafri ka Datuk Saga nan sekaligus memperkenalkan duo orang laki-laki nan nyo sabuik sebagai kamanakannyo. Nan gapuak banamo Eri Taduang dan kuruih lesuik nan tiok sabanta mairuik angok kareh, banamo Idaih Pangok. 

“Bara laweh tanah datuak ko ?” tanyo Syafri. 
“Kalau dibilang bara lawehnyo, di nagari kami ko pusako kaum kami nan paliang laweh mah”, kato Datuak Saga jo suaro nan maninggi .  

Syafri jo Rundi maangguak-angguak. 

“Kalau dikiro-kiro, sampai ka bateh piriang sawah nan diujuang tu masih tanah pusako kami juo baru… !”, sambuang  Datuak sambia tangannyo manunjuak 180 derajat, satangah putaran. Iyo sabana laweh tanah kaum Datuk Saga ko ruponyo. 

“ Jadi, status tanah Datuk ko apo?” tanyo Syafri. Samantaro Rundi haniang dan manyimak sajo. 

“Status e asli tanah pusako kami….”

“Mungkasuiknyo, apo alah adoh sertipikatnyo atau indak !”

“Teya, Pak Syafri mah….!” Datuak ko galak mangekeh sambia manyabuik kato “teya” tu. Alun sempat Syafri mambaleh, Datuak ko  lah manyambuang kato : “ Ma pulo adoh tanah pusako tenggi disertipikatkan !”

“Kalau indak adoh sertipikatnyo, ba-a caro kami ka mambali?” solo Rundi. 

“Ha, inyo baitu pulo mah Pak. Kalau apak lah satuju jo harago nan kami latak an….kalau apak  lah serius baniak ka mambali, kito urus molah basamo-samo sertipikatnyo. Kan baitu ndak Taduang….”, Taduang  nan barado di subalah mamaknyo ka mahangguk. Bagi taduang sederhana sajonyo, asal bagiannyo ijan lapeh. Asal hasia jua bali tanah ko ijan sampai nyo lantuang surang dek mamaknyo. 

 “Kan baitu pulo ndak Daih?”, Idaih pangok ka manakannyo ko mahangguak pulo. Dek Idaih, pangananyo samo jo Taduang. Asal lai dapek mamemlok I rumah bininyo, asal dapek mambali oto buruak ka jadi cigak baruak, jadi molah. Sa kok ati mamak lah!

Mandanga penjelasan Datuk Saga, Syafri jo Rundi mahangguak-hangguak sakali lai. 

“Kalau mancaliak lokasi, sabananyo lokasi tanah ko kurang cocok untuak bisnis kami…..”

Mandanga kato Syafri, wajah Datuk Saga mulai agak muruang. Padohal, Syafri tahu bahaso lokasi ko rancak untuak rencana usaho mereka mandirikan SPBU kreatif. Raso harok ko sangajo disembunyikan Syafri, supayo harago tanah ko ijan sampai malangik pulo jatuahnyo. 

“ Eh, tanah kami ko di tapi jalan gadang ko Pak Syafri !”

“ Di tapi jalan iyo ditapi jalan Datuk. Batua Datuak tu,  tapi  biaya panimbun sawah ko pitihnyo indak siagak banyaknyo doh. Mungkin banyak lo biaya panimbun pado biaya pambali tanah ko Datuk!” 

“Kalau soal tanah timbunan, ijan apak capeh. Bukik ujuang tu, kaum kami punyo tu. Ambo bisa maagiah harago tanah timbunan nan agak murah untuak apak. Ba-a gak ati ?” kecek Datuk saga nan sabalunnyo sempat  tamanuang. Inyo mulai cameh kalau Syafri indak baminaik mambali tanah pusako tinggi kaumnyo ko. Namun inyo cadiak lo.Inyo santiang  pulo  manyambunyikan raso harok. 

“Kalau apak indak baminaik indak jadi masalah dek ambo. Kan Baitu ndak Taduang…lai sipakaik Idah tu”, Datuak mancaliak kapado duo kamanakannyo ko nan maangguak-angguak sambia mangecek , “bana Tuak”. 

Kini gilaran Syafri nan badampuang labiah-labiah katikok mandanga bahaso Datuak Saga nan takah iko : “ Kalau apak indak baminat,  bialah ambo juo se tanah ko ka Ko Hiong. Inpestor.  Ko Hiong lah mahago tanah ko jo harago  lotenggi, tapi kami alun sipakaik mamutuihkan… ?”

“Eh ba-a lo Datuak ko. Tanah pusako Datuak jua ka urang Chino.Nan sabana se lah Tuak. Ambo indak ba-a indak jadi mambali, tapi ijan jua ka Ko Hiong !” kato Syafri jo suaro agak tinggi. 

“Dek itu alasannyo mangko tawaran  ko Hiong alun kami iyokan. Kalau lah tadasak bana, tanah ko lapeh ka ko Hiong !” jawek Datuk Saga. Nan duo kamanakan e tatap mandukuang apo kato Datuk jo ekspresi mahangguak-hangguak atau manggeleang-geleang. 

“Kamanakan ambo banyak Syafri. Dunsanak padusi ambo banyak. Tanah kami banyak. Untuak apo tanah kami banyak kalau indak produktif!” kato Datuak  pulo.

“Indak produktif ba-a pulo kecek Datuk ko….iko kan sawah ko mah.Menghasilkan ko!” jawek Syafri. 

“Sawah iyo sawah, menghasilkan iyo menghasilkan  tapi tanah ko alah tagadai dek mamak-mamak kami terdahulu!” kato Datuk Saga. 

Lansuang tabulalak mato Syafri mandanga status tanah ko sudahlah alun basertifikat, tagadai pulo. 

“Banyak bana masalah tanah ko mah Datuk!”

“Indak banyak bagai tu doh. Nan gadai bisa disalasaikan. Nan jaleh, Pak Syafri baminaik atau indak untuak mambalinyo…..?”

Katikok Datuak bakato model itu, henpon Rundi badariang. Ruponyo dari Yanti. Inyo mintak permisi sabanta dan manjauh babarapo langkah dari pembicaraan tu. 

“ Uda, di ma kini?”

“Uda sayang di lokasi jo Syafri kawan  uda tu sayang…..?”

“ Ondeh, indak istirahat gai Uda . Uda kan alun lalok lai Da. Bekoh Uda sakik !” 

Yanti lupo. Mano pernah inyo  tahu, baitu tibo di rumah, Rundi lansuang bacinto gilo  jo bininyo, sudah tu takalok babarapo jam kemudian. 

“Uda…..” manjo suaro Yanti tadanga. 

“Apo ?” lunak Rundi manjawek. 

“Bisnis apo nan ka Uda bukak!”

“SPBU berkonsep wisata, sayang….!”

“ Kalau andaikata Uda butuh tambahan modal, Yanti siap…..!”

Srrrrrrrr, badasia darah Rundi. Mangapo? Inyo jo Syafri memang agak hilang aka juo mancari tambahan dana. Rencana urang ko, kalau dana kurang, tak ado pilihan lain, maminjam ka bank. Dan pinjamannyo, ndak siagak banyaknyo. Bamiliar-miliar jumlah pitihnyo. Maminjam di bank bukan pulo  urusan mudah. Banyak syaraik nan harus dipenuhi. Mulai dari jaminan hinggo prospek usaha nan jaleh. Kini ko usaho ko alun jaleh ban alai. Namun iko pun indak manjadi masalah, dek karano, baik Syafri ataupun Rundi adoh urang dalam nan kamaloloskan kreditnyo tu. 

Namun sarancak-rancak mainjam di bank, tantu labiah rancak juo mamakai modal badariang. Modal badariang ko kini nan sadang ditawarkan dek Yanti ka Rundi. 

Kalau Yanti serius, Rundi adoh rencana manyuruah Yanti ka Bukiktinggi sore ko untuak membicarakan soal keikutsertaan yanti sebagai penyandang modal ! 


(Basambuang) Bukittinggi 300520/6;24)
Read more »
Subscribe to: Posts (Atom)

Contact Form

Name

Email *

Message *

Powered by Blogger.