Mediaportalanda: Senibudaya

Showing posts with label Senibudaya. Show all posts

Novel Minang Pinto Janir "Pacar Lamo" Episode 6 #DirumahSaja

5/29/2020 09:57:00 PM Senibudaya

Oleh: Pinto Janir

Sabalun sampai di muko rumah, perasaan Yanti tatap indak lamak. Inyo sabana cameh. Hujan malam makin dareh sajo . Samantaro, pikiran Rundi baputa-puta kaniak ka ingkin. Saputa ka Yanti. Saputa lai ka Ijah. Bertahun derita perpisahan yang nyo alami jo Yanti. Salamo itu pulo Yanti selalu dalam hati dan tagok di ruang pangananyo.

Kalau bicara soal tanggung-jawabnyo ka Saijah, raso-rasonyo dek Rundi alah labiah dari cukuik. Rumah lah dibuek-annyo untuak Saijah jo anak-anak. Balanjo indak pernah kurang. Bahkan acok inyo labiahkan. Malah mulai dari adik-adik kanduang sampai ka adik-adik sepupu Saijah bagai, inyo kamehan biaya sakolah jo biaya kuliahnyo dek Rundi. Kaduo urang tuo Saijah alah inyo umrohkan bagai.

A juo lai,Jah?

Uang deposito untuak maso depan anak-anak dan Saijah, alah pulo inyo siapkan. Apo lai nan kurang, Jah? Raso-rasonyo, Rundi lah labiah daripado cukuik mambari kebahagiaan untuk Ijah. Baitu kato hati Rundi.

Kini ko inyo ingin mambari kebahagian pado diri sendiri. Apo iko salah?

“ Da….”, Yanti mangajuik an lamunan Rundi. Sabab, katikok oto lah baranti di muko rumah, nan Rundi ko masih tetap diam. Sabananya Yanti tahu kalau Rundi sadang dalam kecamuk lain. Yanti tahu baraso Rundi tantu mamikiakan bininyo. Tapi, ba-a lah, inyo pun cameh pulo mambiakan Rundi pulang dalam keadaan ase oto nan macet di tangah hujan labek nan makin manggilo. Kalau inyo biakan Rundi pulang, kalau tajadi apo-apo ka diri Rundi, Yanti tak mau manyasa saumua hiduik.

“ Da……!” sakali lai Yanti mangajuik an lamunan Rundi jo manapuak lambek bahu kiri Rundi.

“ Oh….yo “, agak tagagau Rundi snek.

Sudah tu Yanti mangecek jo suaro agak mahibo; “ Uda, ndak usah uda kini pulang ka Bukittinggi, rancak Uda tunggu sampai bisuak pagi…..Hujan masih labek Da…Ase oto uda indak pulo elok….”.

Ko bajaleh-jaleh se lah awak kini dih. Nan sabana-bananyo bana, indak adoh bagai ase oto Rundi rusak doh. Masak, Pajero baru asenyo rusak. Nan ka iyo se lah. Sajak barangkek dari rumah bako Yanti tadi, sangajo Rundi indak maiduik-an asenyo. Nan Yanti indak pulo mamparatikan bana. Rundi hanyo ingin tahu, sagadang apo kekhawatirannyo pado diri Rundi. Apo Yanti lai ko lah manahan inyo supayo ijan pulang dulu ka Bukittinggi atau indak?

Rundi sabana baharok Yanti manahan inyo. Tanyato harapannyo manjadi nyato. Tanyato juo iyo ruponyo. Yanti manahannyo. Memang, apo nan dilakukan Rundi ko barisiko tinggi.mamatikan ase di tangah hujan itu babayo. Inyo tahu tu. Tapi, untuak sebuah jawaban hati, risiko tinggi tu lah nyo hadang. Indak inyo hiduik an ase, inyo kecek an rusak. E….alah !

Rundi manjadi tahu kini, tanyato pulo, Yanti sangaik mengkhawatirkan diri Rundi. Samantaro Ijah, indak pernah mengkhawatirkan Rundi. Kalau Rundi pai, yo pai surang se lah. Asal pulang lai salamaik. Baitu prinsip Ijah balaki. Inyo picayo saratuih persen ka Rundi. Sangaik picayo. Makonyo inyo indak paralu banyak tanyo.

Ijah…Ijah. Kalau ka padusi lain, mungkin Rundi bisa dipicayo saratuih persen.Agak co patuih gai rancak e padusi ko, haram Rundi ka tadayo. Ijah tahu tu. Tapi adoh nan indak nyo ketahui dek Ijah, yakni soal Yanti. Rundi tak pernah manyabuik-nyabuik pacar lamonyo ka Ijah.

Makonyo tak adoh alasan Ijah untuk mengkhawatirkan lakinyo ka baraliah ka nan lain.

Kadang-kadang seorang laki memang butuh pulo untuk dikhawatir-khawatirkan. Katikok Yanti mengkhawatirkan Rundi, makin dalam sayang Rundi ka Yanti. Makin tacurah juo hatinyo ka pacar lamo ko. Inyo marasao sabana sajiwa bana, marasao sabana cocok bana, mara sabana bakasasuaian bana jo Yanti. A juo lai, induak kato dari cinto sajati tu adolah cocok. Cocok d hati , cocok di jiwa nyaman di raso.

Kini Rundi ingin membahagiakan diri sendiri. Keputusan Rundi adolah , inyo pulang bisuak pagi ka Bukittinggi.

“ Ba-a kok Uda diam sajo. Yanti indak rilakan Uda bajalan dalam keadaan ase rusak manampuah hujan. Babahayo , Da. Mambana Yanti, uda tunggulah bisuak pagi dih Da “.

Mandanga Yanti mambana takah itu, bantuak urang bahibo-hibo, indak sampai hati pulo Rundi manjawek nan indak sasuai jo harapan Yanti.

“ Iyo.Uda di Padang. Uda pagi ka Bukittinggi”.

Mandanga kato pasti dari Rundi, Yanti tersenyum dengan wajah nan sangaik bahagia.

Sudah tu Rundi bakato. Nyo pandang wajah Yanti jo kasiah sayang. Yanti manunduak. Lambek-lambek nyo sandakan kapalonyo ka bahu kiri Rundi. Sadang oto masih hiduik juo baru. Kaco oto alun dibukak. Masih tatap baranti di muko rumah Yanti.

“ Uda, nginap di hotel sajo !” kato Rundi sambia membelai mesra rambuik Yanti.

Yanti memandang ke Rundi. “ Uda lalok di siko sajolah. Kamar kan banyak. Uda bisa lalok di kamar subalah”.

Rundi maangguk. Oto tu lansuang masuak ka garase rumah Yanti nan kosong.

Tanyato cinto mambuek urang manjadi sagalo barani. Cinto melenyapkan raso takuik. Cinto kalau sadang mambaro, satinggi apopun risiko akan inyo hadang surang . Rundi mulai bapikia gilo, ah di ma ka tibo se lah heh. Bukankah inyo alah lamo mananam cinto ka Yanti, apo salahnyo kalau kini inyo manyiangi. Di ma tumbuah di sinan di siangi. Di ma ka tibo se lah, baitu bisik hatinyo.

Baitu tibo di rumah, Yanti lansuang manunjuak an di ma kamar untuak Rundi, tapek bana di subalah kamarnyo.

Sabananyo Rundi gugup jo gagik. Saumua-umua, sajak manikah jo Ijah, balun pernah inyo nginap di rumah padusi lain. Walaupun indak sakamar bagai, tapi rumah ko sadang kosong. Salah satu tujuan Yanti ka Padang adolah untuak maurus rumah ko. Salamo ko rumah papanyo ko dikontrakkan pado sebuah perusahaan. Kontraknyo lah habis kini. Makonyo kosong.

Baduo jo pacar lamo di rumah kosong, sia lo pulo nan indak ka badabok-dabok darahnyo. Badabok ba-a ka indak, hujan di lua makin indak basiagak. Baranti sabanta, sudah tu nyo tutuh lo dek hujan labek baliak.

Sabalun masuak ka kamar, Yanti mambarikan Rundi baju ganti.

“ Uda pakai sajo iko dulu “, Yanti mambarikan baju kaos oblong ka Rundi.

Rundi paliang indak bisa lalok pakai sawa jin. Makonyo inyo batanyo ka Yanti.

“Yanti, adoh sarawa pendek, hawai indak juo ba-a doh !”.

“Tunggu sabanta, Yanti carikan dulu “.

Yanti masuak ka kamar mausai kopornyo.Samantaro Rundi tagak mamatuang di muko pintu kamar tu. Indak lamo sudah tu, Yanti kalua mambaok an sarawa pendek hawai.

“Untuang adoh ko Da. Tapi, iko iyo sabana-bana sarawa dari Hawaii bana mah Da….!” kato Yanti sambia maagiahan sarawa tu ka tangan Rundi. Sarawa tu di bali Yanti iyo sabana di Hawaii, wakatu inyo pai liburan jo almarhum lakinyo, Satrio .

“Sabalun uda lalok, Yanti buek an uda kopi dulu dih “, kecek Yanti sambia balalu ka dapua sabalun sempat Rundi maiyokan.

Indak lamo sudah tu kopi tibo. Duo insan pacar lamo ko maota-ota di ruang tangah.Mulai dari soal nostalgia SMP hinggo maota-ota mengenai musik. Urang baduo ko salero musiknyo samo.Samo-samo suko ka jazz dan blues.

Adoh sekitar sajam Yanti dan Rundi maota-ota lamak di ruang tangah tu. Walau urang ko gaya maotanya bantuak data-data sajo, tapi duo urang ko samo-samo bakacamuak jo pilinan raso. Walau duduaknyo bajarak dibatehi meja kaco kristal, namun perasaan dan hasrat mereka untuak duduak labiah dakek tak bisa didutoi. Mungkin urang ko masih samo-samo batahan. Rundi batahan, Yanti baitu pulo. Namun debar di dado makin kancang.Samo kancang ka duonyo.

Rundi sayang ka Yanti. Itu kato lah pasti. Tapi apo bisa dipastikan urang ko bisa menjinakkan gelora dan hasrat nan kian manggilo di dado? Kecek urang, rindu kalau alah tajawek, inyo akan manjadi hamba sajo. Inyo akan manjadi biaso. Rindu nan paliang manis adolah rindu nan indak kunjuang tajawek. Cinto itu misteri.Indahnyo justru katikok indak tajawek. Tanyato pandapek ko salah. Rundi dan Yanti bahkan makin bergelora sekalipun cinto dan rindu mereka lah tajawek kini. Rindu sepasang pacar lamo ko agaknya indak pudua-pudua sekalipun hujan dan angina dareh di lua.

Malam tu Yanti baharok, Rundi duduak di subalahnyo. Lalu mamaluaknyo dalam kemesraan. Lalu…..lalu…dan lalu….

Apo yang diharokkan Yanti, sabananyo adolah apo nan adoh dalam pikiran Rundi. Inyo ingin mamaluak Yanti. Hanyo mamaluak sajo. Indak labiah. Tapi itu tak dilakukannyo karano inyo takuik Yanti menganggapnyo sebagai laki-laki nan lah biaso bamacam-macam jo padusi lain. Sumpah, Rundi indak pernah berselingkuh dan mengkhianati Ijah.

Kini Rundi jo Yanti, baduo-duo sajak siang tadi, apo iko indak basalingkuah namonyo tu? Apo iko indak bakhianat ka bini namonyo ko? Rundi baparang jo kato hati surang.

Antah ba-a ko lah, Rundi indak pernah samiang pun menganggap iko sebuah perselingkuhan.Indak pernah maraso inyo alah berkhianat ka Ijah. Apo sababnyo? Karano bagi Rundi , Yanti adolah jiwanyo.Adolah rindunyo. Adolah cinto sajatinyo. Adolah urang nan salamo ko selalu ado di hatinyo nan paliang dalam.

Ijah ba-a?

Ijah tu jodoh. Jodoh? Ya, Ijah di mata Rundi tak lebih sebagai jodoh. Jodoh balun tantu cinto, cinto balun tantu jodoh. Kalau iko nan adoh dalam pikiran Rundi, jadi Ijah adoh di subalah hatinyo nan ma? Apo sekedar sayang? Atau indak cinto samo sakali? Kalau indak, ba-a kok sampai baranak Ijah sampai duo kali dek Rundi?

Ruang nan langang dan haniang tu hanyo ramai dan ribuik dan kalebuik di hati surang-surang.

Yanti dan Rundi samo-samo tadiam. Samo-samo tapatuang. Urang ko sibuk jo pikiran masiang-masiang. Sampai akhirnyo, Yanti minta pamit untuak segera ke kamarnyo.

“Uda, Yanti tidua dulu dih”.

“Yo, tidua lah Yanti dulu. Uda habiskan rokok sabatang ko dulu !”

Ondeh, iyo sabana kecewa Yanti mandanga jawaban Rundi. Padohal, inyo baharok, sabalun masuak kamar, Rundi tagak lalu mamaluaknyo. Tapi itu ba-a kok indak dilakukan pacar lamonyo ko.Kecewa Yanti. Rundi tatap juo asik seperti manikmati rokoknyo.

Apo nan tampak indak takah nan tajadi. Padohal, indak baitu bagai doh. Rundi sadang manggigia surang dalam hati. Manggigia ba-a nan ka indak. Ko pacar lamo adoh di muko. Pacar lamo ko makin lamo dipandang makin rancak juo. Hampiang tak adoh kekurangan pado sabatang tubuh Yanti. Bantuak tubuh Yanti adolah bantuak tubuah nan sangaik diidam-idamkan dek kebanyakan laki-laki.

Yanti berlalu.Inyo lah masuak ka kamar dengan hati kecewa. Nyo ganti bajunyo jo gaun tidua warna putiah bamerek Lingerie.Gaun ko alun sempat nyo pakai.Dulu gaun ko inyo bali di Amerika. Bahannyo santiang. Tipih dan sajuak dipakai. Balinyo bajuta-juta. Makin rancak tubuah Yanti baitu dibaluik gaun lalok bawarna putih ko.

Samantaro, Rundi manyambuang rokok sabatang lai.Inyo alun juo masuak kamar. Baitu habih nan sabatang ko, nyo sambuang lo baliak.Bantuak kareta api, putuih sambuang barang ko marokok.

Samantaro patuih manyamba-nyamba dilua. Yanti paliang takuik mandanga bunyi patuih jo guruah.Kini, takuiknyo ko inyo tahan surang sambia mamakok talingo jo mamiciangkan mato. Yanti maleh kalua.Inyo takuik bekoh Rundi manilainya macam-macam. Rancak inyo batahan sajo di kamar ko.

Samantaro Rundi baru sajo masuak ka kamar. Sabalun marabahan diri ka tampek tidua, nyo tuka baju jo sarawa jo nan diagiahkan dek Yanti tadi.

Pangana Rundi manarawang-narawang . Inyo takah urang maetong jarajak loteng nan indak bajirajak. Samantaro di Bukiktinggi, Ijah lah takalok di ruang tangah di muko tipi dek jak tadi manunggu laki nan alun pulang. Inyo indak punyo kebiasaan mahape laki.Ijah bukan tipe bini nan nyinyia nan tiok sabanta batanyo, di ma Da, jo sia Da, sadang manga Da, pulang lah lai Da…..model-model ko bukan tipe Ijah. Ijah ko tipe bini saulah. Indak pancuriga ka laki !

Samantaro di kamar subalah, Yanti seakan tak pueh-pueh barado dakek Rundi. Inyo malam ko ingin menghabiskan wakatu di sampiang Rundi.

Yanti bodinyo stabil dari gadih sampai lah baranak. Kalau dikatokan Yanti ko gadih, banyak urang nan picayo mah. Modis. Baitu pulo bodi Rundi. Biasonyo, urang kalau lah babini, nan paruik tibo sakali. Nan barek batambah pulo.Rundi indak baitu.Bodi Rundi tatap rancak. Apolagi, sajak SMP hinggo SMA Rundi ko andalan tim basket sekolahan dan jagok lo main bola.

Wakatu SMA Rundi tamasuak cowok nan diidolai dek para padusi. Idola ba-a nan kaindak, awak gagah, utak rancak pulo. Wajah Rundi bantuak-bantuak cowok Mexico agak saangin. Macho !

Maso SMA dulu, Desi anak anggota DPR RI sangaik tagilo-gilo ka Rundi. Desi rancak kok. Hiduang mancuang. Bibir tipih. Kulik kuniang lansek.Mato bulek bantuak bintang pilem India. Pernah Rundi agak-agak dakek jo Desi. Wakatu itu inyo batekat handak malupokan Yanti. Makonyo inyo bausaho pulo mandakek an diri ka Desi nan ka sikolah mambaok oto surang. Tiok pai sikolah, oto diparkirlkannyo di rumah Wati kawan dakeknyo nan tingga indak bara langkah dari sikolanyo.

Pernah Desi maajak Rundi pai jalan-jalan mamburu kuliner di Payakumbuh jo otonyo tu. Ijan salah.Rundi pandai kok mambaok oto. Kakak sepupu Rundi punyo angkot 06. Kalau sudah mancuci angkot tu, Rundi baraja mamajuan jo manyuruik an oto tu hinggo inyo lanca mambaok.

Katikok Rundi manulak mambaok oto Desi, itu bukan karano inyo indak pandai mambaok oto, tapi inyo takuik mambaok Honda Jazz Desi, takuik balantak. Balantak, jo apo kadiganti?

Hanyo tigo minggu luruih Rundi dakek jo Desi. Dek karano, minggu ka ampek, makin nyo cubo untuak malupokan Yanti, justru makin kareh pangana dan bayangan Yanti di ruang mato jo di hati. Makin inyo paso-pasoan malupokan Yanti, makin raso disayik-sayik sambilu raso hatinyo. Makonyo, indak sapatah kato pun inyo agiah kepastian ka Desi sampai Desi nan justru manyampaikan raso suko ka inyo. Tapi, dijawek Rundi, ancak awak bakawan sajo. Indak tangguang-tangguang kecewa hati Desi saat tu doh. Sajak tu, Desi tahu diri , inyo manjauh dari Rundi dengan mambaok luko di hati.

Mangana kaji lamo ko Rundi senyum-senyum surang. Urang nan inyo cintoi salamo ko, kini adoh di subalah kamarnyo.

Samantaro di lua, hujan bantuak basijadi tutunnyo.Sebagian dari kota Padang lah tarandam dek aia. Untuang rumah Yanti barado di tampek katinggian.

Tiba-tiba………..

Duaaaaaaar……!

Patuih tongga manggalaga. Yanti di dalam kamar tapakiak.

“Udaaaaaa!”

Inyo katakutan. Rundi lansuang mahambua ka lua. Nyo lansuang masuak ka kamar Yanti. Ruponyo kamar Yanti tu tak bakunci.

Inyo tagagau mancaliak Yanti nan mamakai gaun tidua warna putiah nan tipih. Samantaro, dek mati katakuik an mandanga patuih tongga nan sabana kareh, reflek Yanti mahambua ka palukan Rundi.

Ondeh Mak….!

Yanti mamaluak dek katakutan, Rundi manarimo palukan dek hasrat laki-laki. Kalau tangan Rundi bantuak urang istirahat di tempat grak, raso-rasonyo samo Rundi jo mandutoi diri surang. Kini ko inyo jujur. Nyo baleh pelukan Yanti. Dalam pelukan Rundi, Yanti marasokan kedamaian nan indak terwakilkan dek kato-kato.

“Uda…uda lalok di kamar ko sajolah…Yanti takuik !”

Ha? Lalok di kamar baduo?

“ Kan Uda bisa lalok di kursi sofa? “ lakeh-lakeh Yanti bakato dek karano adoh keraguan di hati Rundi.Keraguan tu Tabaco dek Yanti.

“ Mintak Uda salimuik Yanti, sagan Uda basarawa pendek!”

Kalau lah “Bauda” Rundi ka badannyo, lah ka gamang ayun di tali gantiang. Di ayun buai iyo lamak. Kalau tali nyo putuih, cilako nan katibo.

Yanti tagak manuju ka lamari di kamar tu. Tamanuang Rundi mancaliak Yanti bagaun lalok tipih. Anggun. Rundi mandaguak liu surang.

Yanti manjuluakan Rundi salimuik. Katikok manarimo salimuik dari tangan Yanti, caliak pandang Rundi alah gak lain. Dabok hati Yanti makin kancang. Katikok tangannyo ka maagiahan salimuik, tangannyo tu diganggam dek Rundi. Makin dakek.Makin tambah dakek. Dasah Yanti seakan jatuah ka ruang nan paliang dalam.

“Uda…!”

Tibo-tibo Yanti malapehkan palukan tu. Urang ko baranjak. Yanti baliak lalok ka ateh kasua, Rundi basilunjua ka ateh kurisi sofa.

Takah-takah adoh upayo urang ko bantuak saliang manahan.Mungkin iko nan dinamoi dengan siksaan nan indah.

Rancak juo tu, supayo bala jan tibo, makonyo rancak juo Rundi lalok di kursi sofa nan adoh di kamar tu. Nan indak bisa ditahankannyo adolah satiok mancaliak ka arah Yanti nan mamakai gaun tidua nan tipih tu nan indak basalimuik. Raso-rasonyo Rundi sadang barado di kamar pengantin di malam partamo sausai pesta.

Inyo pernah mancubo malam partamo jo Ijah. Rasonyo indak takah iko bana indahnyo doh. Sabab, di malam partamo tu Rundi justru sadang takana dan mambayangkan wajah Yanti. Wakatu malam partamo jo Ijah tu justru inyo mambayangkan diri, kalau sakironyo Ijah ko adolah Yanti tantu sempurna malam pengantinnyo.

Kini ko Yanti sakamar jo inyo. Tanyato hiduik ko pikiran. Apo nan dipikiakan dengan bana-banalambek lamo akan menjelma manjadi sebuah kenyataan. Nyo pandang Yanti sadang tiduanyo. Matonyo alah tapiciang. Sumpah, ma bisa Yanti lalok. Lah nyo cubo-cubo maciangkan matonyo, namun takah lirik lagu Minang, mato lalok hati batanggang. Lah sadakek tu Rundi darinyo, nan hanyo bajarak ampek langkah dari tampek tiduanyo, ka Rundi juo pangananyo baru lai. Rundi takah itu lo.

Lah nyo piciang-piciangan matonyo, pangananyo bantuak balando mintak tanah. Diagiah hati mintak jantuang. Diagiah lalok dikurisi sopa, mintak lalok di ateh tampek tidua taba.

E….alah!

Konyol Rundi tibo, inyo baharok supayo patuih nan karehnyo takah tadi, kok dapek tibo lo baliak sakali lai. Buliah mahambua Yanti ka inyo. Samantaro, Yanti baharok takah itu juo. Namun nan patuih ko indak lo kunjuang tibo-tibo.Patuih pantang diharok ruponyo. Tanpa alasan nan jaleh, Yanti malu pulo manyuruah Rundi lalok disubalahnyo. Inyo tahu, kurisi sofa ko panjangnyo gantuang pulo dari kaki Rundi. Pasti tidua Rundi indak nyenyak, baitu pikiran Yanti.

Kok kadisuruah Rundi lalok diateh kasua ko, terus terang, Yanti malu. Malu sebagai padusi. Malu dianggap Rundi anhe-aneh. Sumpah, Yanti indak pernah baduo-duo di kamar jo laki-laki lain selain jo almarhum suaminyo. Samantaro, patuih nan diharok tak kunjuang tibo.

Dalam hatinyo Rundi bapikia, mancari alasan nan tapek supayo bisa tidua di subalah Yanti. Inyo bae purak-purak gaelisah. Nyo lunjua-lunjua an kakinyo nan malabihi panjang kurisi sambia mamiciangan mato. Pas katikok samo-samo mambukak mato, pandangan urang ko baradu.

Indak dapek diagak. Kini Rundi baprinsip takah tadi, dima ka tibo se lah lai heh. Bekoh, bekoh lo dipikiakan. Nan jaleh inyo tagak dari kurisi, sudah tu nyo bajalan ampek langkah, tibo di subalah Yanti. Nyo lansuang lalok di sampiang Yanti.

Dabua dado Yanti samakin kareh. Rundi samakin kareh pulo, dabuanyo. Nyo mamandang ka Yanti. Yanti mambaleh dengan senyum nan paliang ngilu.

Hujan lah mulai rado agaknyo. Nan tasiso hanyo dinginnyo sajo.

Walau tidua basubalahan. Walau bahu suok jo kida lah saliang lakek. Walau gelora dan hasrat samakin dareh, namun Rundi ingin tetap bertahan. Sakatiko saketek kato bana tumbuah di hatinyo. Bahaso apo nan inyo lakukan iko adolah kaliru. Salah !

Inyo tagak dari tidua.

Lansuang Yanti bakato: “ Uda kama?”

Dijawek dek Rundi, “ Baru takana dek Uda, bahaso pagi ko uda adoh janji jo Syafri kawan bisnis Uda. Kami barencana ka mambukak SPBU di jalan raya Bukittinggi Payakumbuh nan bakonsep SPBU rekreasi!” .

Yanti tadiam. Adoh kekecewaan yang sangaik dalam di hatinyo.Raso kecewa tu nyo raguaknyo surang dalam hati taibo-ibo. Inyo maraso tagaing surang.

“Kan, bisa uda barangkek sudah subuah. Hari baru jam ampek Da !”

“Ragu Uda, bekoh telat “.

Sakali ko Yanti indak mampu manahan Rundi. Padohal inyo ingin lamo-lamo adoh di sampiang Rundi. Ingin lamo-lamo lalok di subalah Rundi, walau indak malakukan nan takah-takah itu bana. Baginyo, barado di sampiang Rundi adolah sesuatu nan sangaik indah.

Keindahan tu kini, lanyok sakatiko .Rundi lah manuka sawa hawai dan baju kaosnyo jo pakaiannyo samulo.

Inyo pamit ka Yanti. Yanti malapeh jo hati tagantuang. Nyo lapeh Rundi jo lambaian, tanpa pelukan tanpa kecupan di kening.Iko nan mambuek Yanti tapadiah. Inyo manggigik bibia malapeh Rundi pacar lamonyo.

Yanti masuak ka kamar. Aia matonyo jatuah.

Samantaro, Rundi malarikan otonyo jo kecepatan nan kancang. Kini tabayang dek inyo Ijah, dan duo anaknyo Grendi dan Suci.

Nyo takan gas sakancang-kancang antah. Antah ba-a ko lah, kini ko inyo ingin lakeh-lakeh tibo di rumah….

Makin nyo takan lari otonyo tu…..

(Basambuang) Bukittinggi 270520/12;13

Novel Minang Pinto Janir "Pacar Lamo" Episode 5 #DirumahSaja

5/29/2020 05:07:00 AM Senibudaya

Oleh:Pinto Janir

Sewaktu muko Rundi dan Yanti bajarak dari sajangko hinggo makin dakek sajo, raso gemuruh di dado tak takiro-kiro. Mambuncah. Bantuak ombak aia tawa nan mahampeh kareh tapi bibia karang. Pacah.Bagamuruah.Kalau ombak manjangkau raso tak pernah sampai-sampai usah dabua ombak nan disalahkan?

Sia nan salah? Rundi atau Yanti atau keadaan?

Tak ado yang salah. Kalaupun adoh nan salah tu adolah manga Rundi manatap duo bola mato Yanti satajam takah ko bana. Raso tairiah-iriah dindiang hati Yanti. Raso ka putuih tali jantuang dibueknyo manarimo tatapan mato pacar lamo. Tatapan mano nan indak asiang lai bagi dirinyo. Kini tatatapan tu bantuak bungo kambang tumbuah di hati.

Padusi mano nan sanggup manantang mato urang nan dicintoi. Baitu pulo nan tibo di bakeh diri Yanti.Inyo manunduak.Aia matonyo jatuah babarapo titiak katikok Rundi mangganggam tangannyo. Lambek-lambek tangan tu nyo rangkuah ka dadonyo nan bagamuruah. Sudah tu, Rundi manyeka aia mato yanti jo ujuang ampunyo. Lambek-lambek tangannyo manyibak-an rambuik Yanti yang jatuah ka muko. Dengan lembut pulo inyo sayang kaniang Yanti.

Batambah kancang gamuruah di ruang dado. Alun pernah inyo marasokan kehangatan belaian dan kasih sayang dari lelaki. Seperti kehangatan dan kenyamanan nan inyo rasokan kini. Belaian Satrio suaminyo nan alah maningga dek kecelakaan kerja—kalau pun dibaleh Yanti, itu tak lebih dari pengabdiaannyo sebagai seorang bini.

Tak labiah dari itu. Inyo melayani Satrio sebagai “kewajiban”. Namun, kini inyo indak tahu “kewajiban” apo nan kini inyo rasokan. Apo ko pelukan pacar lamo wajib dibaleh? Indak lah. Kalau indak, ba-a kok coiko kejadian. Sabagitu dahsyatkah kekuatan cinto, sahinggo sesuatu yang keliru masih dianggap sesuatu yang bana.

Apo lo namonyo ko ha. Apo ko iko nan dinamokan cinto? Cinto nan ba-a? Cinto nan salah atau rindu nan talarang?

Tapi kini, apo yang inyo rasokan adolah apo yang pernah nyo bayangkan datang dari seorang kekasih hati nan banamo Rundi. Bayangannyo tu kini manjadi nyato. Inyo seakan indak mampu lai manahan isyarat cinto. Sayok cinto Rundi ibaraiklah takambang di hadapannyo. Kini keputusan tingga di tangan Yanti, apo inyo akan manarimo sayok cinto nan alah dikambangkan Rundi atau indak?

Tanyanto Yanti manyarah di sayok cinto Rundi. Inyo manyarah dalam palukan hangat Rundi. Yanti pasrah. Pasrah bana inyo kini. Inyo mulai indak peduli, kalaupun sayok cinto nan manggungguangnyo tabang tinggi ko suatu kali nantik akan malapehkannyo. Inyo bahkan siap luko.Siap jatuh.Siap pulo kecewa!

Di lua hujan makin dareh sajo. Angin kancang mandaru-daru pulo. Lagu soundtrack filem Titanic nan tadi bersahut-sahutan mereke terjemahkan padohal alah jak tadi habihnyo. Namun seakan-akan, lagu tu makin indah terngiang kembali. Padohal lagu itu lah jak tadi habisnyo. Lah lamo mati. Tapi lagu itu kini justru hiduik di hati mereka masing-masing.

Yanti marasokan kedamaian nan indak bisa diterjemahkan katikok barado dalam pelukan Rundi. Samantaro, Rundi marasokan telah menemui kembali cintonyo nan alah lamo hilang.

Biasonyo, kalau padusi manarimo jo mambaleh pelukan seorang laki-laki karano cinto dan kasih sayang atau kewajiban tu tadi. sadangkan laki-laki biasonyo mamaluak dek karano ingin dan kebutuhan. Inyo ingin, dek karano Yanti adolah cinto sajatinyo.Inyo butuh dek karano, hayalannyo tentang Yanti tidak pernah runtuh dan indak pernah taduah-taduah.

Katikok padusi lah manyarah. Katikok mato lah mulai lindok jo manunduak pulo, mako ibaraik kapa balayia, katikok itulah laki-laki manjadi nakhoda panuah. Tasarah mau dibaok kama arah kapa atau ka dermaga mano handak ka dilabuahkan.

“Uda…..” lirih suaro Yanti tadanga kalo mano tangan si Uda tu alah agak lain caro pacik jo arahnyo.

“Uda….!” Sakali lai….agak tertekan suaro Yanti.Walau baitu, inyo indak pernah mangecek an “Uda jangan….!”

Hanyo Rundi se nan tasadar surang. Inyo sadar. Kesadarannyo tu karano inyo maraso was-was dan takuik melakukan hal labiah jauh, labiah dalam, labiah indah, labiah hangek. Inyo takuik, dek karano Yanti ko dalam pangananyo masih jadi bini urang. Inyo indak tahu, kalau Yanti lah surang diri.

Nan kaduo, inyo gamang dan maraso basalah ka Ijah dek karano persis di suduik rumah tu inyo takah mancaliak bayangan Ijah nan sadang manangih. Tapi, di sisi lain, inyo masih ingin menumpahkan rindu nan lah balumuik-lumuik tumbuah di hatinyo ko.

Indah jo hangat suasana hati urang tu kini.

Keindahan bayangannyo tu buyar katikok tabayang dek Rundi duo anaknyo Grendi jo Suci nan seolah-olah mahimbau: “Papa……!”

Braaaakkkkkk!

Mandadak Rundi malapehkan palukannyo ka Yanti. Yanti manunduak. Urang ko kembali duduak di kursi. Tapi indak sakursi lai. Rundi mamiliah kursi lain di muko tampek duduak Yanti.

“Minumlah kopi tu dulu Uda, lah dingin kopinyo… “, kato Yanti sambia marapikan rambuiknyo nan agak-agak kusuik saangin dek ulah tangan si Rundi nan agak-agak lasak tapi indah.

Dek karano Rundi masih juo diam, bantuak urang bapikia kareh, lalu Yanti mahambiak an Rundi kopi nan alah tingga satangah galeh nan alah dingin tu. Sikap-sikap takah iko nan indak pernah dilakukan Ijah ka Rundi. Ijah tu elok iyo elok. Rancak iyo rancak. Lunak iyo lunak. Tapi, ma pernah Ijah sampai “manyuok-an” kopi ka Rundi takah apo nan dilakukan Yanti kini ka inyo.

“Mokasih , sayang….!”

Ha, pakai sayang lo mah. Mandanga kato sayang tu, agak sirah juo snek wajah Yanti nan tasipu malu.

Kemudian mereka duduak maota-ota. Rundi mambaka rokoknyo. Hirup rokoknyo saraso damai.

“ Waktu tamat SMP tu, ba-a kok Yanti diam-diam sajo pindahnyo. Manga ndak mangecek saketek juo ka Uda?” mulai Rundi maungkik maso lamo.

Yanti bantuak urang heran. Bahkan inyo justru takah manyalahkan Rundi. Wakatu inyo pindah dek karano papanyo dapek jabatan baru di Banduang, inyo lah matitipkan surek ka Mayang. Kawan sakelas mereka. Di surek tu lah nyo tuliskan jaleh-jaleh di ma alamat rumahnyo di Banduang, langkok jo kode posnyo bagai.

Mayang adolah anak mamak tibonyo dek Rundi. Karano ayah Mayang sepupu laki-laki dek Ibu Rundi. Ayah Mayang ko sanak- laki-laki nan tasabuik bagak di kaum ibu Rundi. Inyo mamak kapalo warih. Ibu Mayang sarato sadonyo dunsanak padusinyo, banci ka Ayah si Mayang dek karano, sado alah he tanah pusako tinggi kaum mereka tandeh dijua dek Ayah si Mayang. Nyo balikan ka oto Datsun atau ka oto oplet untuak manombang.

Limo oto oplet nan dibali dari hasil manjua tanah pusako tu, cayia kalimo-limonyo. Nyo balikan ka oto Kijang bukak karateh. Dipakai dek kakak Mayang, masuk jurang di pandakian Sitinjau Lauik. Kakaknyo tu maningga . Dari tanah pusako tinggi tu, dek ayah Mayang dibangunkan pulo untuak ka rumah dek anak bininyo. Rumah sudah, tahun di muko tabaka.

Kecek urang di kampuang, matilah…kanai sumpah aruah nenek moyangnyo tu. Kok dapek, pusako tinggi usahlah dijua. Awak kan indak pernah tahu, jo caro apo atau jo caro-caro ba-a mamak-mamak wak terdahulu manuruko atau mandapek an tanah tu sahinggo manjadi milik kaumnyo.

Nah tanyato, si Mayang sajak SMP tu kanai hati kareh ka Rundi. Rundi indak menanggapinyo, karano inyo menganggap Mayang nan itam manih ko tak lebih sebagai adik sajo. Pernah dahulu, ayah Mayang mamaso Ibu Rundi untuak mamintak Rundi ka untuak laki anaknyo. Istilahnyo pulang ka bako. Keinginan ayah Mayang ditulak jo caro haluih dek Ibu Rundi sarayo mangecek an bahaso alah talambek, sebab Rundi alah dijodohkan pulo dek ayahnyo jo anak Ridwan Datuk Sago, kawan dari ayah Rundi.

Itu carito lamo. Kini carito barunyo, Yanti bahkan seolah-olah manyalahkan Rundi dek karano inyo sabalun pindah alah manitipkan surek ka Mayang.

“ Dulu Yanti alah titipkan surek. Lamo Yanti manunggu balasan surek dari Uda. Kini Yanti batanyo, ba-a Uda indak mamabaleh surek Yanti?” kato Yanti dalam nada kecewa.

“ Surek…..? Surek apo?” justru Rundi heran dan balik batanyo ka Yanti.

“Iya, mengapa Uda tidak balas”, Yanti batanyo dalam bahasa Indonesia logat rang Sunda.

“Indak pernah tibo di tangan uda surek tu doh, Yanti !”

Mandanga jawek Rundi, Yanti tapana.Inyto manyasa dalam hati pernah menyalahkan Rundi bertahun-tahun.

“Jadi Mayang tak pernah mengantarkan surek itu ka Uda?”

“Indak !” kini dengan pasti Rundi manjawek.

Tabayang dek Rundi, satahun lalu Mayang pernah datang ka toko bajunyo di jalan Minangkabau Bukittinggi. Wakatu tu Mayang manangih-nangih mintak bantuan pitih ka Rundi karano lakinyo terlibat narkoba ditangkok polisi, kanai hukum batahun-tahun. Lakinyo tukang pakang. Pakang sagalo pakang.Mulai pakang tanah hinggo pakang oto bagai. Mayang pun sakit-sakitan.Inyo mandapek kanker payudaro. Tingga manyewa di rumah petak kawasan Tangah Sawah. Untuak hiduik sahari-hari, Mayang nan punyo limo anak ko manarimo upah jahitan. Wakatu tu, Rundi mambantu Mayang Rp 5 juta. Samantaro ayah Mayang strok, dititipkan Mayang di panti jompo karano Mayang hanyo baduo baradik kakak. kakaknyo maningga masuk jurang.

Rundi manggeleng-geleng kapalo.

Inyo manarik hangok dalam dalam, lalu malapehkan panjang-panjang bantuak urang manyasa. Antah apo nan nyo sasali, awak indak pulo tahu. Mungkin inyo manyasa manga kok indak pernah bausaho mancari kaba barito tentang Yanti.

Tapi kini, yo sudahlah. Bukankah inyo kini ko lah batamu jo Yanti, si pacar lamo?

Hari lah sore. Hujan labek lah tingga rinai, sabanta lai mungkin hujan taduah taduah.

“Apo Uda baliak kini ka Bukittinggi?”

Katikok Yanti batanyo iko, sungguh.Sumpah mati, inyo berharap bana Rundi manjawek : “indak”.

Tapi tanyato jawaban Rundi adolah : “ Iyo”.

Raso kecewa tu disimpan Yanti di dadonyo di tampek mano namo Rundi bataman indah sajak dulu hinggo kini. Inyo ingin labiah lamo barado di sampiang Rundi. Nan Rundi sabananyo baitu juo. Tapi, ba-alah.

Soal ba-a kok surek indak disampaikan Mayang ka Rundi indak pernah mereka bahas lai. Mereka labiah banyak mambahas maso-maso SMP dulu. Mambahas parangai si Hengki nan acok mangicuah Tek Jus nan bakantin dalam sikolahnyo. Nyo lantuang bakwan tigo, nyo bayia ciek. Ibaraik bali ciek dapek duo. Atau mambahas si Karin anak baru nan manjadi incaran kawan-kawan salokalnyo, kecuali Rundi. Pokoknyo mereka bacarito bagalak-galak dan bahagia bana tampaknyo pasangan ko sore tu.

Pado saat bacarito galak-galak itu lah Rundi tibo-tibo batanyo tentang Yanti. Dicaritokan dek Yanti, mulai waktu SMA hinggo kuliah. Wakatu SMA dulu di Banduang inyo pernah ditaksir dek anak seorang Bupati. Satantang ko lakeh-lakeh Rundi menyela.

“Ha tu, Yanti tarimo?”

“Indak”

“Ba-a tu?”

“Kan ada Rundi….”

Mereka saliang senyum.

Sudah tu Yanti bacarito, inyo kuliah di Fakultas Kedokteran Universitas Padjadjaran. Katikok lah ka masuak program koas, inyo baranti.

“Ba-a Yanti kok baranti?”

“ Sahabat papa menjodohkan Yanti dengan putranya yang alah bakarajo di Amerika. Seorang doktor….”

“Yanti tarimo?”

“Bukan Yanti yang manarimo, tapi papa !”

Jawaban Yanti itu ndak dilanjutkan dek Rundi jo pertanyaan “ba-a kok manarimo”. Indak paralu pertanyaan ko inyo hadok an bana ka Yanti dek karano Rundi tahu papa Yanti agak otoriter snek. Kalau inyo hadok an pertanyaan takah iko, berarti inyo manyuduik-an Yanti. Tampaknyo alam bawah sadar urang nan baduo ko samo-samo sepakat untuak indak batanyo ka hal-hal yang dapek manyuduik an raso.

“Sudah tu ba-a?”

“Kami menikah.Lalu lansuang ka Amerika. Dapek anak surang. Didit namonyo. Tu nan Yanti baok ka Bukittinggi….”

“Di ma Didit kini , Nti?”

“Patang Didit dijapuik dek bako Yanti urang Gunuang Pangilun”.

Ohyo, papa Yanti urang Gunuang Pangilun asli. Mama Yanti urang sunda. Sajak papa Yanti manikah jo mamanyo, papanyo alah agak jarang pulang ka Gunuang Pangilun ka rumah tuonyo. Bahkan jarang pulang ka Padang walau katikok papa Yanti batugeh di Bukittinggi dulu. Hanyo keluarga papanyo nan acok datang ka Bukittinggi dulu. Hubungan tiu agak ranggang karano mamak dari papa Yanti mainginkan papa Yanti mancari bini urang Minang. ijan urang subarang. Sabab, kalau papanyo babini jo urang lua, anaknyo indak basuku. Tapi kehendak mamak tu dilawan dek Papa Yanti, inyo tatap mamilih nak gadih sunda nan lah malahirkan Yanti.

Kini hubungan nan agak ranggang tu, ingin diperbaiki Yanti. Tapi walau jarang pulang ka Gunuang Pangilun, papa Yanti tatap mambantu biaya kuliah kamanakannyo. Kapatang nan manjapuik Didit tu adolah si Hendra nan biaya kuliahnyo sampai tamaik di Unand dibiayai dek papa Yanti. Malah katikok Hendra malanjuik an S2-nyo di Banduang, tatap dibiayai papa Yanti dan bahkan tingga di rumah Yanti hinggo tamaik.

Sudah Rundi batanyo....

“Oh yo, ba-a kok suami Yanti indak ikuik ka Padang mangawani Yanti?”

Pertanyaan Rundi ko bana nan mambuek Yanti tadiam agak lamo.

“Ba-a kok Yanti diam?”

Pertanyaan Rundi dijawab Yanti dengan menundukkan kepala.

“Maaf Yanti, kalau uda salah batanyo….”

Yanti manggeleng-geleng lunak.

“Indak…uda indak salah doh Da….!”

Indak lamo sasudah tu baru Yanti maagiah tahu bahaso suaminyo maningga dek kecelakaan dalam karajo.

Mandanga ko, adoh duo perasaan nan tumbuah di hati Rundi. Nan partamo, inyo ibo ka Yanti dan Didit. Perasaan nan muncul adolah raso ibo jo sadiah. Nan kaduo, parasaan “lain”. Antah sanang antah indak, ndak jaleh dek wak doh. Nan jaleh raso-raso adoh sesuatu nan tabukak dalam hiduik Rundi. Mandanga tu iduiknyo saraso lampu togok, tarang-tarang galok. Tarang katikok takana bahaso Yanti adolah kekasih sejatinyo nan alah surang diri.Galok katikok wajah Ijah terhampar di hadapan mata.

Yanti adolah kenangan lamo, samantaro Ijah adalah fakta terkini!

Yanti tadiam baitu sudah manyampaikan bahaso lakinyo lah tiado.

Rundi?

Nan Rundi menanggapi takah iko.Takah bantuak urang indak tahu jo kato. Kato-katonyo manjadi biaso.Manjadi klise:” Uda turuik baduka. Yanti saba yo…..!”.Yanti maangguak dan matonyo memandang Rundi dengan lindok. Salindok-lindok mato Yanti, adoh sesuatu nan indak bisa inyo sembunyikan, yakni raso harok!

Tapi, apo bisa mengharapkan kekasih nan alah jo urang lain takah Rundi lah milik Ijah.Bisakah?

Yanti batanyo.

“Rundi dan keluarga ba-a? Lai elok-elok sajo?”

Rundi indak manjawek. Kok dibilang elok-elok sajo, itu duto namonyo. Elok apo pulo namonyo ko kalau sampai kini inyo alun juo bisa malupokan Yanti . Kalau elok keadaannyo, tantu indak ka nyo baleh pelukan mesra Yanti tadi. Indak ka tajadi takah tadi.

Dek Rundi diam, Yanti indak namuah manaruihan pertanyaan labiah detil ka Rundi.Inyo tahu, Rundi tasuduik jo pertanyaan nan takah iko. Inyo indak namuah maniayo perasaam Rundi jo pertanyaan nan manyuduik an hati.

Yanti indak bisa mandutoi perasaan surang. Memang adoh perasaan bersalah nan tumbuah di hatinyo ka bini Rundi. Tapi perasaan ko takubua dek raso cintonyo nan sabana gadang pulo ka Rundi. Inyo maraso punyo hak pulo untuak memiliki Rundi. Bagaimana pun inyo maraso labiah dulu mamiliki Rundi ketimbang Ijah nan datang belakangan. Bahkan justru inyo nan maraso bahaso Ijah lah marabuik pujaan hatinyo.

Sudah tu, Yanti maajak Rundi manjapuik Didit ka Gunuang Pangilun. Tibo di Gunuang Pangilun, pintu lansuang dibukak an dek Hendra kamanakan papa Yanti. Nan Didit lansuang malompek ka rangkuhan Yanti. :” Mama, Didit mau tidur samo anak-anak Om Hendra. Didit ndak mau pulang”. Baitu kecek Didit nan tahu agaknyo bahaso mamanyo ka manjupuik dirinyo. Yanti mangosok-gosok kapalo Didit jo kasih sayang.

“Oh, yo Hend…ko Uda Rundi…..”

Yanti mengenalkan Rundi ka Hendra nan tampak agak tabinguang-binguang mamandang laki-laki nan dibaok dek uni Yanti-nyo ko.

“Oh, iko nan Uda Rundi tu Ni? Nan acok uni carito-caritokan dulu ka Hendra.Ganteng urangnyo yo Ni…..!” Hendra lakeh manyalami Rundi dengan hangat. Bantuak urang tak asiang.

“Masuak ni…masuak Da Rundi !”

Hendra mempersilakan Yanti dan Rundi masuak ka rumahnyo. Samantaro Didit lah lari se kadalam rumah dek karano asik bamain-main jo anak Hendra. Hendra pun maimbau Rini bininyo dan memperkenalkan Rundi ka bininyo tu. Maota-ota lah urang ko sampai ba jam-jam bagai. Bahkan Rundi sampai manumpang solat Isya di rumah Hendra.

Samantaro hari lah jam sapuluah malam. Hujan dareh tibo pulo baliak. Tapi Rundi indak pernah gelisah. Indak ko lah takana dek ka baliak ka Bukittinggi?

Nun jarak 100 kilometer dari siko, Ijah di Bukittinggi mulai gelisah mananti laki. Tapi Ijah ko indak pernah berkebiasaan batanyo atau mahubungi laki, di ma kini. Inyo bialah manunggu di ruang tamu sambia manonton tipi jo anak-anaknyo.

Untuang Yanti arif. Capek-capek inyo minta pamit ka Hendra dek karano Rundi ka baliak hari ko juo ka Bukittinggi. Nan Didit indak namuah dibaok pulang ka rumah Yanti di Ulak Karang dek karano Didit talamak bamain-main jo anak-anak Hendra.

Hujan makin labek. Eh cilakonyo, antah apo nan rusak, ase oto Rundi bermasalah pulo. Hari hujan, ase oto rusak pulo. Maso oto rancak bisa pulo kanai asenyo. Kaco oto Rundi bakabuik, maeseh-eseh jalan oto tu kini.

“Hati-hati Uda…..” Yanti tapakiak, ampiang sajo tasemba honda dek Rundi.

Hampiang ka tibo di Ulak Karang, lah ka dakek ka rumah Yanti, dengan panuah kekhawatiran Yanti mangecek bantuak urang cameh.

“ Uda…rancak uda pulang bisuak pagi sajo...!”

Rasai....

E...yayai...

(Basambuang) Bukittinggi 250520/11;43.

Novel Minang Pinto Janir "Pacar Lamo" Episode 4 #DirumahSaja

5/28/2020 01:18:00 AM Senibudaya

Oleh: Pinto Janir

Batamu jo pacar lamo, baduo-duo di rumah nan langang. Ondeh. Ba-a pulo agak jo rasonyo tu ha. Iko nan maaduak-aduak pangana jo perasaan Rundi. Iko nan mambuek Rundi khawatir. Iko nan mambuek Rundi tagamang surang. Apo Rundi lai ka mampu manahan diri? Inyo ragu jo dirinyo surang. Inyo indak picayo jo kemampuannyo manahan diri.

Kalau ndak tahan ba-a?

Oke. Kalaupun Rundi mampu manahan diri, ba-a kalau Yanti indak mampu? Kalau tajadi nan indak-indak, lai indak ka caruah ko lah dunia dibueknyo ko. Baradiak si bungsu dibueknyo bekoh ba-a?

Ciek lai, sampai kini Rundi alun tahu ba-a status Yanti. Apo masih punyo laki atau indak. Kalau inyo punyo laki, lakinyo tu dima kini. Lakinyo ko ba-a? Banyak pertanyaan Rundi nan tumbuah dalam pangananyo.

Walau banyak pangana tumbuah dalam pikirannyo, namun Rundi sagan batanyo ka Yanti karano itu sifatny agak pribadi agak sensitif. Masak, baru basobok pertanyaanlah ka itu sakali...ndak mungkinlah!

Lagi pulo tujuannyo mangunjungi Yanti tak lebih untuk sekedar bersilaturahmi, lalu bernostalgia-nostalgia sajo. Tak lebih dari itu. Picayolah !

Ba a lah ko ha. Bakacamuak raso jo pangana dalam badan diri Rundi. Tapi, Yanti ko lah babarapo kali manyuruahnyo masuak ka rumah. Tapi, Rundi tatap manulak maota dalam rumah. Sagadang-gadangnyo cinto Rundi ka Yanti, tapi Rundi tatap bapikia agak bana saangin. Sabuto-butonyo cinto, masih adoh pikiran nan kamanjadi kaco pembesarnyo. Nan ka jadi panyariangnyo.

Kalau tajadi apo-apo, di saat itu Rundi alah melakukan kesalahan besar di mata Tuhan. Yanti tu bini urang. Rundi alun tahu kalau Yanti tu kini indak baduo lai. Suaminyo alah maningga. Harusnyo iko nan wajib partamo ditanyo Rundi. Tapi si Rundi ko indak lo batanyo soal iko doh. Inyo takuik Yanti tasingguang. Soalnyo iko kan urusan privasi. Walaupun Rundi urang nan indak siak-siak bana, tapi inyo saketek banyaknyo lai juo tahu ma nan doso gadang ma nan dosonyo ngenek.

Babuek salah jo bini urang, tu dosonyo indak saagak gadang e tu doh. Indak tabayang dek Rundi ba a lah ka kareh e cambuak malaikat tibo di badannyo. Pado kanai lapia dek malaikak dalam kubua, ancak nyo kubua se dek Rundi pikiran-pikiran aneh nan ka marusak jalan akhiraiknyo nantik.

“Ancak awak maota di barando ko se…bisa sambia caliak-caliak bungo!” baitu kato Rundi manulak haluih tawaran Yanti.

“Uda mau minum apo?”

Abih buah Rundi dek kanai “uda” ko. Inyo indak ka pernah manyangko bahaso akan dipartamukan Tuhan jo pacar lamonyo. Tapi, ba-a kok pertemuan ko telat. Ba-a kok Tuhan indak sajak-sajak dari dulu mampartamukan inyo jo Yanti. Ba-a kok batamu katikok mano Rundi lah adoh Ijah, lah adoh Grendi anaknyo nan kelas 5 SD dan alah adoh pulo si bungsu Suci.

“Kopi se lah…!”

“Uda ko, dari dulu ka dulu kopi ka kopi sajo”, baitu kecek Yanti. Sabananyo Yanti tahu, minuman kesukaan Rundi adolah kopi ka kopi. Sebab, beberapo kali wakatu SMP, katikok inyo baraja kelompok jo Rundi di rumah Yanti, nan nyo mintak dek Rundi tatap kopi…kopi sangenek gulo.

“Sangenek gulo kan Da!”

Katikok Yanti manyabuik “sangenek gulo” lamo jo jauh pandang bola-bola mato Rundi. Ba-a ka indak.Tanyato Yanti masih tahu jo apo saleronyo.

“Da…da…Da….!” Yanti manapuak awang-awang di mungko Rundi nan tapana jo pandangan mato kosong…

“ Eh…eh…iyo….saketek gulo!” jawek Rundi sakali lai bantuak urang baru tajago dari lalok.

Ondeh mande, manggeleang geleang Rundi dalam hati katikok aroma rambuik Yanti nan basah tu tagerai disimbah angin nan sadang bakisai kancang di tangah Padang. Wakatu tu langik siang di tangah Padang agak galok. Agak bantuak-bantuak ka hujan. Aroma rambuik Yanti tu sangaik manikam jantuang hati Rundi.

Pas katikok Yanti tibo jo sagaleh kopi, hujan kancang turun pulo badarun bak bunyi bah.

“Hujan Da. Tampiyehnyo kancang. Di dalam sajo alah awak duduak dih ”.

Sakali ko Rundi masuak bantuak kanai cucuak iduangnyo. Mandudu se inyo ka dalam. Kali ko inyo indak bisa manulak dek karano alasan tapek. Hujan jatuah ! Tapi sadaraeh-dareh bunyi hujan jatuah manimpo atok tantu labiah dareh juo bunyi gamuruah di dado urang nan baduo ko lai.

Di dalam ruang nan ba cat putiah barasiah tu, sarupo lah disiapkan Yanti sebuah lagu untuk manyambuik Rundi.

Judul lagunyo My Heart Will Go On. Laguko dinyanyikan dek Celine Dion sebagai soundtrack filem Titanic. Bukan lagunyo nan menjadi kenangan baik bagi Rundi maupun bagi Yanti. Nan jadi kenangan bagi mereka adolah katikok Yanti, Rundi, Iral, Wati, Iwan, Dani dan Ipen nan marupokan kawan-kawan kalompok belajar di sekolahnyo—pai barami-rami manonton filem Titanic ko ka bioskop Raya Padang. Naik oto NPM di Jambu Aia. Nan berkesan, Rundi jo Yanti duduak baduo di bangku lakang dakek pintu. Manjalang sampai di Padang, Rundi jo Yanti bacarito-carito soal masa depan.

“Yanti, kalau nanti awak bajodoh, Rundi akan buek an Yanti rumah nan catnyo warna biru !”

“Indak. Yanti indak suko warna biru. Yanti suko warna putih !

“ Yanti Rundi buek an rumah di tangah sawah !”

“Indak.Yanti indak suko.Yanti suko rumah nan pemandangannyo adoh lembah dan gunung !”

“Yanti, Rundi buek an rumah nan gadang !”

“Indak. Yanti indak suko. Nan Yanti suko rumah nan ketek tapi halamannyo gadang”.

Selalu jawaban Yanti, indak suko se taruih. Paneh hati Rundi nyo bantai batanyo lai.

“Jadi apo nan Yanti suko?”

Ditanyo takah itu, bola mata Yanti nan taduah mamandang lamo ka mato Rundi. Dipandang dengan pandangan yang begitu, mambuek jantuang hati Rundi bantuak tatikam-tikam sayang.

“Apo nan Yanti suko?”

Jo senyum paliang lunak Yanti manjawek.

“Nan Yanti suko adolah, Rundi selalu adoh dakek Yanti salamonyo!”

Tahaniang Rundi.Tapi tangannyo indak diam. Agak kreatif snek. Nyo ganggam tangan Yanti jo caro tasuruak-suruak supayo jan tampak dek apak nan duduak di subarang kurisi tu ha. Gaek ko jak tadi memperhatikan mereka sajo. Mungkin gaek ko taingek pulo mah jo kisah maso mudo e, ndak?

Sudah tu Rundi babisiak lambek-lambek. Babarapo halai rambuik Yanti kanai dihiduang Rundi karano kaco jandela oto ko tabukak sangenek. Wangi rambuik e nan takah iko nan barusan tahidu dek Rundi tadi. Aroma Yanti tu adoh dalam pangana Rundi. Aroma tu indak baurubah sampai kini.

Awak tahu, Rundi tu suko mambaco. Inyo suko bana mambaco karya-karya S William Shakespeare yang sangat malegenda di dunia itu? Inyo suko mambaco puisi-puisi Shakespeare. Bahkan inyo pernah juo mambaco naskah drama nan ditulih dek pujangga asal Stratford-upon-Avon, Inggris tu. Inyo pernah mambaco kisah Romeo and Juliet, Othello,Hamlet,King Lear dan Macbeth.

Walau Rundi indak santiang-santiang bana manulih, namun salero bersastranyo cukuik tinggi. Kalau pulang sikolah, inyo acok ka lapak kaki limo Inyik Tondeh nan manggaleh bermacam buku di Pasa Ateh. Inyo bisa perai manulih, dek dapek deknyo gili Nyik Tondeh. Kadang-kadang, kalau Inyik pai Sumbahyang, nyo picayoan galeh sabanta ka Rundi.

Samantaro, jo caro tasuruak-suruak, Yanti seakan susah malapehkan ganggaman tangan Rundi.

Bakato molah Yanti: “ Rundi, berjanjilah untuak indak ka pernah maninggakan Yanti !”

Rundi indak manjawek. Tapi pacik tangannyo makin kareh. Inyo jawek keraguan Yanti itu jo puisi Shakespeare nan bajudul “ I am Afraid” .Nyo bacokan lambek-lambek di talingo Yanti : “ Kau bilang kau suka hujan/ tapi kenapa kau membuka payungmu ketika hujan /Kau bilang kau suka matahari/tapi kenapa kau mencari tempat berteduh ketika matahari bersinar/Kau bilang kau suka angina/tapi kenapa kau menutup jendelamu ketika angin bertiup/Inilah yang aku takutkan/kau mengatakan kau juga mencintai aku”.

Antah di ma latak sadiahnyo puisi tu, nan jaleh aia mato Yanti jatuah di ateh bus ko. Jujur sajo, Yanti sabananyo indak mangarati-ngarati bana jo puisi. Tapi, katikok puisi tu dibisikkan ka talingonyo dek urang nan paliang dicinto, aia matonyo jatuah tanpa suaro tangih. Hanyo baganang-ganang bak aia hujan jatuah badarai. Taraso dek nyo, sabananyo, inyo pun ragu, akan kelanjutan cinta mereka. Sebaliknyo, Rundi pun ragu juo, apo cinto ko lai ka sampai ko lah.

Urang baduo ko samo-samo ragu jo kelanjutan cintonyo dek karano, indak ka mungkin. Indak ka mungkin urang tuo Yanti menyetujui hubungan anaknyo jo Rundi nan hanyo urang kelas biaso. Indak ka mungkin, papa Yanti ka salamonyo bertugas di Bukittinggi. Karano- papanyo acok bapindah-pindah tugas. Indak ka mungkin cinto nan tajalin dari SMP akan lanjuik sampai ka pelaminan dek karano perjalanan waktu masih panjang.

Iko hanyo cinto monyet! Cinto daripado indak. Tapi, tanyato indak takah itu nan taraso baik di hati Rundi maupun di hati Yanti. Mereka sudah seolah-olah seperti cinta yang dewasa, bukan cintanya bocah-bocah SMP lagi.

Baitulah. Sampai bus masuak kota Padang, tangan tu alun juo lapeh-lapeh pacik e lai. Lah basah duo tangan tu dek saliang mangganggam. Dan salanjuiknyo mereka pergi ke bioskop Raya manonton pilem Titanic !

Lagu filem Titanic tu lah kini nan sadang diputa di ruang tangahko.

“ Apo yang Yanti ingek tentang lagu ko?” tanyo Rundi sambia mambaka rokok jo managuak kopi.

“Di ateh bus katikok awak barami-rami manonton filem Titanic di bioskop Raya”.

Rundi manarik nafasnyo. Agak tasadu.Agak bantuak taibo hati.

My Heart Will Go On, lagu Titanic nan dinyanyikan dek Celine Dion ko tandanga di antaro garudu hujan nan makin basijadi, satiok itu pulo urang nan baduo ko saling bersahutan-sahutan menerjemahkan lagu nan babahaso inggirih tu.

Lagu tu maruak ka ruang nan kini sadang indah.

---Every night in my dreams I see you, I fell you---

“Setiap malam di dalam mimpiku aku melihatmu, aku merasakanmu”, ujar Rundi sambil menarik rokok dalam sekali.

----That is how I know you go on---

“ Inilah caraku tahu kau tetap ada”, balas Yanti menerjemahkannya.

----Far across the distance And spaces between us---

“Terbentang jarak yang jauh dan pemisah diantara kita”, ulas Rundi.

---You have come to show you go on---

“Kau harus datang untuk memperlihatkanmu tetap ada”, Yanti menerjemahkan seraya ikut bernanyi-nyanyi kecil mengiringi lagu ini.

----Near, far, wherever you are I believe that the heart does go on----

“Dekat, jauh, dimanapun kau berada , kuyakin bahwa hati tak akan pergi”, giliran Rundi menerjemahkannya.

-----Once more you open the door And you're here in my heart----

“Sekali lagi kau buka kan pintu dan kau disini di dalam hatiku”, ujar Yanti seraya terus bernyanyi mengiringi Celine Dion.

----And my heart will go on and on---

“Dan hatiku akan selalu tetap ada dan selalu ada….”, balas Rundi dalam suara bergetar. Bagaimanapun lagu ini tak bisa ia dustai telah membuat hatinya “remuk”. Remuk, karena kenyataannya, Yanti bukan miliknya. Yanti istri orang.Begitu dugaan Rundi yang tak tahu kalau Yanti sudah ditinggal mati oleh suaminya.

----Love can touch us one time-----

“Cinta dapat menyentuh kita satu waktu”, ujar Yanti dalam terjemahan lagu.

-----And last for a life time----

“Dan terakhir untuk seumur hidup”, balas Rundi malanjuik an mengartikan lagu. Rundi joy anti ko sajak SMP bapacu-pacu hebatnyo babahaso Inggris mah. Bahaso Inggris urang baduo ko selalu 9 !

----And never let go till we're gone---

“Dan tak akan pernah melepaskannya sampai kita tiada”, kato Yanti seakan sangat hafal bana akan lagu ini, dan inyo mengigit bibir sendiri katiko sadang menerjemahkan bait ini. Sarupo adoh nan inyo tahan-tahan. Tapi apo?

----Love was when I loved you----

“Cinta terasa ketika aku dicintai olehmu”, kecek Rundi kamudian.

----One true time I hold to----

“Satu kebenaran waktu yang kutunggu”, Yanti manyambuang. Tapi pado bait iko…Rundi merasa terpukul. Terpukul karano waktu yang ditunggu itu saraso lah lanyok.

----In my life we'll always go on----

“Di dalam hidupku kita akan selalu tetap ada”, katiko Rundi menerjemahkan lagu iiko tibo-tibo Yanti yang tadi duduk di kursi nan lain kini barasak duduaknyo di kursi sofa di sabalah Rundi.

Jantuang Rundi naik-naik turun indak beraturan. Sungguah, saat itu inyo takah urang manahan sesuatu yang sangat hebat dalam dirinyo. Maaf.Rundi tu laki-laki tulen. Ingin raso-rasonyo inyo mamaluk Yanti. Tapi itu indak dilakukannya.Inyo takuik . hati kareh paruik badampuang. Padohal pada saat itu, Yanti ingin bana Rundi mamaluaknyo sakali ko. Tapi, itu tatap indak dilakukan dek Rundi.Lelaki nan adoh di hatinyo ko hanyo bantuak patuang. Indak kreatif stek alah he!

Lagu itu taruih sajo bagama.

----Near, far, wherever you are----

“Dekat, jauh, dimanapun kau berada”, lirih suaro Yanti menerjemahkannyo.

----I believe that the heart does go on----

“Aku yakin bahwa hati tak akan pergi”, kata Rundi. Saat itu, mato Yanti alah agak lindok. Agak agak bantuak mato urang manahan rindu nan sakapa.

----Once more you open the door and you're here in my heart----

“Sekali lagi kau buka kan pintu dan kau disini di dalam hatiku”, lunak suaro Yanti. Sementara Rundi seakan tak juo kunjuang arif . Ba-a kok coiko bana ha?

-----And my heart will go on and on----

“ Dan hatiku akan selalu tetap ada dan selalu ada”, balas Rundi. Urang ko saliang batatap pandang. Pandangan Yanti ka ruang kenangan.Pandangan Rundi ka ruang kasih sayang.

Ondeh, lapeh juo keran ko bantuaknyo ko mah . Katikok itulah, Rundi maraih tangan Yanti. Amuak di dado duo insan ko sabana bagamuruah. Sabana buncah. Ba a aka lai ko?

Hujan di lua makin labek. Lagu taruih baputa. Duduak urang ko lah samakin marapek. Keadaan hampiang tak normal. Rundi lah ampiang lupo jo Grendi anaknyo, jo Ijah bininyo, jo Suci anak bungsunyo.

Sakali lai, urang ko lah baradu pandang. Duduak dakek bamungko-mungkoan. Jarak mungko lah tingga satangah jangka luruih. Dado Yanti bagamuruah. Rundi model itu lo, tapi paruik e pacah.

Namun dari satangah jangka jarak mungko, lagu lamo makin hiduik dalam raso, makin dakek.Makin wangi…

Tapi ba-a kok aia mato Yanti jatuah baganang? Adoh apo?

(Basambuang ) Bukittinggi 23052020/02;20